«Jolaýshylar tasymaly» AQ sý basqan aýyldardan halyqty kóshirýge jumyldyrylýda
ASTANA. QazAqparat - Temirjolshylar jergilikti bılik organdarymen jáne tótenshe jaǵdaılar qyzmetterimen birlesip, Qaraǵandy oblysynyń sý basqan aýdandarynan halyqty qaýipsiz jerge kóshirýge belsendi atsalysýda, dep habarlaıdy QazAqparat.
«Jolaýshylar tasymaly» AQ baspasóz qyzmetiniń habarlaýynsha, ótken jeksenbi kúnderi kompanııanyń «Soltústik» fılıaly bólgen arnaıy vagondarmen 660 adam «Qaraǵaıly-Qaraǵandy» baǵdary boıynsha tasymaldandy.
Munan bólek, irgeles stansalardan jolaýshylardy qaýipsiz aımaqqa jetkizý úshin qala mańy tasymalyna arnalǵan elektr poıyzdary da jumyldyrylǵan. Máselen, «Astana-Qaraǵandy-Astana» baǵytyndaǵy №6857-6858 poıyzymen 171 adam tasymaldandy.
«Búgin Aqmola oblysynyń Arshaly aýdanyndaǵy sý tasqynyna baılanysty Volgodonovsk aýyldyq okrýgine qarasty 42-razezdiń turǵyndaryn qaýipsiz jerge kóshirý úshin taǵy 3 jolaýshylar vagony bólindi», - delingen kompanııa aqparatynda.
