«Jolaýshylar tasymaly» AQ parki jańa vagondarmen tolyqty
NUR-SULTAN. QazAqparat – «Jolaýshylar tasymaly» AQ Bas dırektory Mıhael Kortıým men «Tulpar-Talgo» JShS óndiris jónindegi dırektory Ramazan Tileýlenov elordadaǵy Nur-Sultan-1 stantsııasynda jańa vagondardy tanystyrdy, dep habarlaıdy QazAqparat tilshisi.
Vagondar reseılik Tver vagon zaýyty (TVZ) tehnologııasy boıynsha «Tulpar-Talgo» zaýytynda shyǵarylǵan.
Aıta keterligi, bıyl otandyq temir jol parkine TVZ tehnologııasy boıynsha 63 jańa vagon qosylyp otyr. Onyń 25-i osydan úsh aı buryn iske qosylyp, shilde aıynan beri «Almaty-Mańǵystaý» baǵyty boıynsha qatynaıtyn poıyzdardyń qataryn tolyqtyrǵan. Ekinshi partııa 15 vagon qyrkúıek aıynda paıdalanýǵa berilse, sońǵy 23 vagon búgin qoldanysqa engizilip otyr.
Jańa platskart vagondar 54 orynǵa eseptelgen. Qyzmet etý ýaqyty – 40 jyl. Joldaǵy maksımaldy jyldamdyǵy – 160 shaqyrym/saǵat.
«Atalǵan vagondardy «Jolaýshylar tasymaly» AQ suranysy boıynsha 2019 jyldan bastap iske qosyp kelemiz. Ózińiz kórip otyrǵandaı, qazirgi qoldanystaǵy vagondardan ereksheligi bar. Uzyndyǵy - 25 metr. Burynǵy «Talgo» poıyzdaryna qaraǵanda keńirek», - dedi Ramazan Tileýlenov.
Onyń aıtýynsha, vagon ishinde kondıtsıoner men órtke qarsy júıe, eki bıotýalet, vıdeobaqylaý júıeleri ornatylǵan. Ár vagonda 6 vıdeokamera ornatylǵan. Ol beıneni túrli-tústi jáne aq-qara rejimde túsiredi. Barlyq taspa shtabtyq vagondaǵy poıyz basshysynyń qadaǵalaýynda bolady. Ár kýpe men ortaq dáliz eki 220 V qýat beretin rozetka jáne uıaly telefondy qýattandyrýǵa arnalǵan eki USB-portpen qamtylǵan. Ár vagonda jolserikke arnalǵan tońazytqysh pen mıkrotolqyndy pesh, aýyz sý dıspanseri men ystyq sý toly tıtan ornatylǵan. Sonymen birge, baılanys, dıagnostıka jáne basqarý júıeleri qarastyrylǵan. Ájethanalar ekologııalyq taza blok qondyrǵylarymen tolyqqan.
«Jańa vagondardyń alǵashqy partııasy Almaty men Mańǵystaý aralyǵyna júre bastasa, sońǵy 23-niń Nur-Sultandaǵy, Atyraý men Mańǵyshlaq stantsııalarǵa qatynaıdy. Kelesi jyly taǵy 146 vagon shyǵarylady. Ázirge ol vagondardyń qaıda qatynaıtynyn men aıta almaımyn. Kelisimshartqa áli qol qoıǵan joqpyz», - dedi Ramazan Tileýlenov.
