«Jolaýshylar tasymaly» AQ Basqarma tóraǵasy taǵaıyndaldy

ASTANA. QazAqparat - «Jolaýshylar tasymaly» AQ Basqarma tóraǵasynyń (Prezıdentiniń) mindetin atqarýshy bolyp Qılybaı Nurdáýlet Igilikuly taǵaıyndaldy, dep habarlaıdy «Jolaýshylar tasymaly» AQ baspasóz qyzmetinen.

Qılybaı Nurdáýlet Igilikuly 1978 jyly 10 sáýirde Mańǵystaý oblysynda dúnıege kelgen. M.Tynyshpaev atyndaǵy Qazaq kólik jáne kommýnıkatsııa akademııasyn, L.N.Gýmılev atyndaǵy Eýrazııa ulttyq ýnıversıtetin bitirgen. Tasymal protsesin basqarý jónindegi ınjener, qarjyger. Onyń eńbek joly Qazaqstan Respýblıkasynyń temir jol kóligimen baılanysty. Eńbek jolyn 1999 jyly «Qazaqstan temir joly» RMK Atyraý tasymal bóliminiń Mańǵyshlaq stansasynda kezekshi retinde bastaǵan. Keıin qabyldaýshy-tapsyrýshy, bas maman bolyp qyzmet etti. 2002-2008 jyldar aralyǵynda «QTJ» UK» JAQ-da túrli laýazymdardy atqardy. 2008-2011 jyldary - QR Kólik jáne kommýnıkatsııa mınıstrliginiń Jol qatynasy komıteti tóraǵasynyń orynbasary, «Vokzal-servıs» AQ Prezıdenti, «QTJ» UK» AQ-nyń jolaýshylar tasymaly jónindegi basqarýshy dırektory. 2011 jyldan bastap 2013 jylǵa deıin «QTJ»UK» AQ-da, QR Kólik jáne kommýnıkatsııa mınıstrliginde basshy qyzmetinde boldy. 2013 jyldyń tamyzynan 2015 jyldyń qyrkúıegi aralyǵynda - «QTJ» UK» AQ Apparat basshysy - Basqarýshy dırektory.