Jolaýshylar suranysynyń artýyna oraı «Aqtóbe» júrdek poıyzyna 8 qosymsha vagon qosyldy

ASTANA. 4 sáýir. QazAqparat - Jolaýshylar suranysynyń artýyna baılanysty «Jolaýshylar tasymaly» AQ «Aqtóbe-Astana» baǵytyndaǵy №87/88 «Aqtóbe» júrdek poıyzynyń quramyna 8 qosymsha vagon qosty.

Atap aıtqanda, qosymsha «Grand sanatty» 1 vagon, múmkindigi shekteýli azamattar úshin 1 «Grand sanatty» vagony, «Bıznes sanatty» 2 vagon, 1 vagon-konverter jáne 3 «Týrıst» vagony tirkeldi. Osy arqyly jańartylǵan quram 19 vagonnan 27 vagonǵa deıin kóbeıtildi.

Jańa vagondar «Jolaýshylar tasymaly» AQ jyljymaly quramynyń tehnıkalyq resýrstaryn jańartý jáne arttyrý baǵdarlamasyn júzege asyrý aıasynda satyp alyndy, dep habarlady «Jolaýshylar tasymaly» AQ baspasóz qyzmeti.

Qazirgi ýaqytta №87/88 «Aqtóbe» poıyzy jup kúnderi kúnara qatynaıdy. Jazǵy maýsymda quramdy kúndelikti qatynaýǵa aýystyrý josparlanýda.

Atap óter jáıt, ústimizdegi jyldyń 1 sáýirinen «Jolaýshylar tasymaly» AQ №1/2 «Almaty-Astana» - «Tulpar», 151/152 «Almaty-Petropavl» - «Jetisý» jolaýshylar poıyzdarynyń «Grand» jáne «Bıznes» sanatty vagondarynda, sondaı-aq №87/88 «Aqtóbe-Astana» - «Aqtóbe» poıyzynyń «Týrıst» vagonynda jol júrýge 20% jeńildikter engizildi.