Jolaýshylar poıyzynyń tirkemege soqtyǵysýy: Traktorshy taǵylǵan kinámen kelispedi
ASTANA. QazAqparat - Qostanaı oblysynda astyq tıelgen traktorǵa birden eki poıyzdyń soqtyǵysý oqıǵasyna qatysty sot úkimi shyqty, dep habarlaıdy QazAqparat «Qostanaı jańalyqtary» saıtyna silteme jasap.
Buǵan deıin habarlaǵanymyzdaı, oqıǵa bıylǵy qyrkúıek aıynyń basynda Prıtobolskaıa-Apanovka ótkeliniń 178-shi shaqyrymynda boldy. Alǵashqyda astyq tıegen K-700 traktorynyń tirkemesine jolaýshylar poıyzy soǵyldy. Arqalyqqa bet alǵan poıyz jolaýshylary din aman. Arada 7 mınýt ótken soń, soqqymen kórshi jolǵa laqtyrylǵan tirkemege júk poıyzy soǵylady.
«Qazaqstan temir joly» AQ tekserý júrgizip, bolǵan oqıǵaǵa traktordyń júrgizýshisi kináli degen qorytyndy jasady. Traktordyń úsh tirkemesi bolǵan, munyń ózi zańǵa qaıshy. Ol temirjol ótkelimen ótip bara jatqanda kezekshi úshinshi tirkemesinen aqaý baıqaǵan. Tirkemeniń dóńgelekteri baǵanalar men relsterdi búldirýi múmkin bolǵandyqtan, temirjol ótkeliniń kezekshisi júrgizýshini toqtatqan. Júrgizýshi ótkeldiń ústine toqtaýǵa májbúr bolyp, úshinshi tirkemeni traktordan ajyratýǵa tyrysqan. Biraq ýaqyty jetpegen. Tirkemege birinen soń biri eki poıyz soǵyldy.
Іs aýdandyq sotta qaraldy. Onda, oqıǵa kezinde K-700 júrgizýshisiniń tehnıkalyq tólqujaty, al kólik quralynyń nómirleri bolmaǵany anyqtaldy. Temirjolshylardyń aıtýynsha, traktor júrgizýshisiniń salǵyrttyǵynan adamdardyń ómirine qaýip tóndi. Temirjol múlkine de qomaqty somaǵa shyǵyn keltirildi.
Al traktorshy jumys isteıtin «Asar-07» JShS oqıǵaǵa temirjol ótkeliniń kezekshisi kináli dep sanaıdy. JShS ókili Sergeı Sýdakovtiń pikirinshe, kezekshi apattyń aldyn alýy múmkin edi. Máselen, baǵdarshamnyń júrýge ruqsat etipeıtin belgilerin qosý qajet bolǵan. Onyń ornyna, poıyzdyń jaqyndap qalǵanyn bile tura, traktordy ótkeldiń ústinde toqtatqan.
Sot qaýlysy boıynsha, K-700 júrgizýshisi 14 AEK kóleminde aıyppul tóleýi tıis. Ol júrgizýshi kýáliginen aıyrylǵan joq. «QTJ» AQ ázirge materıaldyq shyǵynnyń ornyn toltyrý týraly shaǵym túsirgen joq. Sebebi traktorshy aýdandyq sottyń shemimen kelispeı, talap-aryz bergen.
