Jolaýshylar poıyzy «Esil» stansasyna apattyq jaǵdaıda toqtady

ASTANA. QazAqparat - «Esil» stansasyna apattyq jaǵdaıda toqtaǵan jolaýshylar poıyzynyń mashınısi qoryqqannan qashyp ketti, dep habarlaıdy «QazAqparat» HAA tilshisi.

Bul týraly «QazAqparat» tilshisine  «Túrkisib Astana» JShS dırektory Vladımır Rojko telefon arqyly  aıtty.

«Mashınıst tejegishti durys paıdalanbaǵan, barlyq gáp osynda jatyr. Poıyzdyń tejegishin durys iske qospaǵandyqtan dońǵalaqtar jubynda aqaý paıda bolyp, bul poıyzdy ary qaraı júrgizbeı tastaǵan. Bul jerde mashınıst kináli. Ol esh jerge qol qoımastan qashyp ketti», -dedi V. Rojko.

Osyǵan sáıkes, áleýmettik jelilerde «Almaty-Qostanaı» baǵytyndaǵy №43 poıyz stansasynda birneshe saǵattan beri toqtap tur degen shaǵymdar jazyla bastady.

«Túrkisib Astana» JShS dırektory Vladımır Rojko poıyz uzaq turmaıtynyn, kóp uzamaı jolǵa shyǵatynyn aıtyp, ýáde berdi.

«Qazir aqaýlardy jóndeý jumystary aıaqtalyp qaldy, vagondar tirkelip jatyr. Poıyz 20 mınýttan keıin júredi»,-dedi ol.