Jolaýshylar poıyzdarynan kóptegen kemshilikter anyqtaldy - IDM
ASTANA. QazAqparat - QR Investıtsııalar jáne damý mınıstrliginiń Kólik komıteti maýsymnyń 7-i men 15-i aralyǵynda 13 jolaýshylar poıyzyn tekserdi, dep habarlaıdy QazAqparat komıtettiń baspasóz qyzmetine silteme jasap.
Solardyń ishinde Almaty-Manǵyshlaq baǵytymen júretin №377/378, Almaty-Oral - №379/380, Almaty-Saratov - №7/8, Almaty-Aqtóbe - № 33/34, Almaty-Saryaǵash - №85/86, Atyraý-Mańǵyshlaq - №313/314, Astana-Qyzylorda - №89/90, Almaty - Atyraý - №35/36 quramdary bar.
Inspektorlar tekseris barysynda 23 bıletsiz jolaýshy tasymaldanǵanyn, 55 jolaýshylar men bagajdy tasymaldaý erejeleri buzylǵanyn anyqtady. Nátıjesinde 19 ákimshilik is qozǵalyp, tasymaldaýshyǵa 350 myń teńgeden astam somaǵa aıyppul salyndy.
13 tekseris materıaly belgilengen jolaýshylar poıyzynda qyzmet kórsetý talapqa saı bolmaýyna baılanysty zańdy tulǵalarǵa qatysty ákimshilik materıaldar qurý úshin Kólik komıtetiniń aımaqtyq bólimshelerine jiberildi. Jiberilgen materıaldar boıynsha aıyppuldar somasy 550 myń teńgeni quraıdy.
Odan basqa maýsym aıynyń 18-i men shildeniń 8-i aralyǵynda komıtet 27 jolaýshylar poıyzdarynda jolaýshylarǵa qyzmet kórsetý salasyndaǵy ulttyq standarttyń jáne sýbsıdııalaý sharttarynyń talaptaryn tasymaldaýshylar buzǵanyn anyqtady. Nátıjesinde 260 zańbuzýshylyq anyqtaldy. Atap aıtqanda solardyń ishinde aýa kondıtsıonerleri júıesi men ishki qurylǵylardyń aqaýlyqtary, vagondardyń qanaǵatsyz sanıtarlyq kúıi, tósek-oryn sapasy jáne basqalary bar.
Sýbsıdııalaý sharttarynyń talaptary sheńberinde tasymaldaýshylarǵa jalpy somasy 12 mln teńgeni quraıtyn tólengen sýbsıdııalardy qaıtarýǵa sanktsııalar berildi. Anyqtalǵan zańbuzýshylyqtardy jaqyn arada joıýǵa nusqaý berildi.
Osy baǵytta jumys ári qaraı jalǵasýda.
