Jolaýshylar qulap bara jatqan ushaqtan sekirip úlgerdi
ASTANA. QazAqparat - Jańa Zelandııada jolaýshylar ushaǵy apatqa ushyrady. Lenta.ru habarlaǵandaı, jolaýshylar men ekıpaj aman qaldy.
Skydive Taupo áýe kompanııasy ushaǵynyń apattyq jaǵdaıy Jańa Zelandııanyń Soltústik aralynda ornalasqan Taýpo kóliniń mańynda oryn alǵan. Ushaq bortynda 13 adam: alty jolaýshy, alty ekıpaj múshesi men ushaq komandıri bolǵan.
Laınerde aqaýlyq shyqqan soń barlyǵy parashıýtpen qamtamasyz etildi. Sun Herald aqparatynsha, jolaýshylar ekıpaj múshelerimen juptasyp sekirgen. Sońǵy jup laıner qulaýǵa birneshe sekýnd qalǵanda sekirgen. Ushqysh ta aman qalyp, ol óz betinshe jaǵalaýǵa jetti.
Polıtsııanyń baspasóz hatshysy Kım Perkstiń (Kim Perks) aıtýynsha, jolaýshylar men ekıpaj músheleri medıtsınalyq tekserýden ótti. Aýyr jaraqat alǵandar bolmady.