Jolaýshylar bolmaǵandyqtan «Kókshetaý-Almaty» reısi keıinge qaldy

KÓKShETAÝ. QazAqparat – Aqmola oblysynyń «qyzyl aımaqtan» shyǵýyna baılanysty jolaýshylar tasymalyn jandandyrý máselesi qaralyp jatyr. Bul týraly Aqmola oblystyq jolaýshylar kóligi jáne avtomobıl joldary basqarmasy basshysynyń orynbasary Aleksandr Rýblevskıı aıtty, dep habarlaıdy QazAqparat tilshisi.

«Aqmola oblysynyń «qyzyl aımaqtan» shyǵýyna baılanysty sanıtarlyq postar alynyp, karantın jeńildese, Kókshetaý jáne Stepnogor baǵytyndaǵy avtobýs qozǵalysy qaıta jandanady. Budan bólek, Azamattyq avıatsııa komıteti jeltoqsannyń 8-nen bastap «Kókshetaý – Almaty, Kókshetaý – Aqtaý» baǵytyndaǵy áýe reısterin jandandyrýdy sheshken bolatyn. Degenmen, jolaýshylardyń bolmaýynan Almatyǵa alǵashqy reıs keıinge qaldyryldy. Endigi ýaqytta suranys bolyp jatsa ǵana júzege asyrylady», – dedi óńirlik kommýnıkatsııalar qyzmetinde ótken brıfıngte Aleksandr Rýblevskıı.

Aıta ketsek, qarashanyń 5-inen bastap «Kókshetaý – Almaty», «Kókshetaý – Aqtaý» baǵytyndaǵy áýe reısteri, al aıdyń sońynda oblysta qaýipti indettiń taralýyna baılanysty engizilgen karantınge sáıkes Kókshetaý jáne Stepnogor baǵytyndaǵy avtobýs qozǵalysy toqtatylǵan edi.

Al, jolaýshylar poıyzynyń qozǵalysy buryn bekitilgen kestege saı, ıaǵnı Kókshetaý – Qyzylorda – Petropavl – Almaty poıyzy qarashanyń 12-nen bastap eki kúnde bir júrip jatyr.

Munda jolaýshylardy otyrǵyzyp-túsirý 1,2 jáne 3 klasty vokzaldar ornalasqan stanıtsııalarda ǵana júzege asyrylady.