Jolaýshylar avtobýsyn urlap ustaldy
ALMATY. 26 qyrkúıek. QazAqparat /Erbol Azanbek/ - Almatyda jolaýshylar avtobýsyn urlamaq bolǵan azamat ustaldy, dep habarlaıdy qalalyq ІІD-niń baspasóz qyzmeti.
Qalalyq baǵyttyń birinde júretin «MAN» avtobýsyn ıesi «Aınabulaq-2» yqsham aýdanyndaǵy úıiniń aýlasyna qoıǵan. Tańerteń avtobýstyń joqtyǵyn kórip, polıtsııaǵa habarlasqan.
«Avtobýs túnde urlanǵan. Ury terezeni shaǵyp kirip, toqtaryn jalǵaý arqyly ot aldyrǵan. Ury ýdaı mas bolǵan, sáttilikke ol urlap aıdaǵan kóliktiń aldynan eshkim shyqpapty. Ol avtobýs ıesi polıtsııaǵa habarlasqanǵa deıin-aq ustaldy. Jol polıtsııasynyń sholǵynshy qyzmeti júrisi «qısyq» avtobýsty kórip, toqtatqan. Tekseris nátıjesinde mas adamnyń kólikti urlap aıdap bara jatqany belgili boldy», - deıdi Almaty qalalyq Jol polıtsııasynyń bastyǵy Arman Sarbasov.
Avtobýsty urlamaq bolǵan 29 jasar Ontústik Qazaqstan oblysynyń turǵyny bolyp shyqty. Dosyna qonaqqa kelgen ol avtobýsty mastyqpen aıdap shyqtym dep otyr. Qazirgi kezde avtobýs ıesine qaıtarylyp, ustalǵan azamat qylmystyq jaýapkershilikke tartyldy.
Ótken táýlikte osyǵan uqsas taǵy bir qylmys oryn aldy. Rozybakıev -Ótepov kósheleriniń qıylysynda mototsıkl urlamaq bolǵan Ońtústik Qazaqstan oblysynyń 21 jasar turǵyny qolǵa tústi. Almatyǵa ýaqytsha jumysqa kelgen ol aılyǵyn azsynyp, mototsıkldi urlap, satpaq bolǵan. Alaıda polıtsııa qyzmetkerleriniń qolyna túsip, ústinen qylmystyq is qozǵaldy.
