Jolaýshyǵa toly avtobýsta elektrondy kartamen jol aqysy qalaı tólenedi

ASTANA. QazAqparat - 31 qazan kúni Jolaýshylar kóligi jáne avtokólik joldary basqarmasy janyndaǵy «Astana LRT» kompanııasy elordanyń ekspress baǵyttaryna jol aqysyn tóleý kóliktik kartalar arqyly iske asýy múmkin ekenin jarııalady.

QazAqparat tilshisi jańa júıege elordalyqtardyń qanshalyqty daıyn ekenin tekserdi. Keshki qarbalas sátte adamǵa lyq toly №101 ekspress avtobýsyndaǵy jolaýshylardyń eshqaısysy jol aqysyn onlaın tólegen joq.

Jolaýshynyń kóptiginen esigi áreń ashylyp-jabylatyn avtobýsta kondýktor bolǵan joq. Jolaýshylar 150 teńgeni júrgizýshige berý úshin avtobýstyń aldyńǵy bóligine ótti. Sebebi júrgizýshi jol aqysyn jınaý úshin tek qana aldyńǵy esikti ashty, munda bir rettik bılet týraly sóz qozǵaýdyń ózi artyq.

 

Basqa avtobýstyń kondýktorlarynyń ishinde bılet bermeıtinderi de kezdesedi. «Qaıtar jooda №102 ekspress baǵdardaǵy 651 nómirli avtobýsqa otyrdym. Taǵy da kondýktor arnaıy kıimdi kımegen, jolaqyǵa aqsha alǵanymen «bılet joq dep» ony bermedi. Avtobýstyń ishi las, shańdy boldy. Nelikten sońǵy aıaldamaǵa barǵanda edendi súrtip alýǵa bolmaıdy. Sonymen qatar jolaqy qymbat - 150 teńge. Basynda bul avtobýstarmen júrý jaıly edi», - dep jazady Feısbýkte Aqmaral Ómirálınova.

Aıaldamalarǵa ornatylǵan avtomattardan kólik kartasyn satyp alý jáne ony toltyrý týraly jergilikti turǵyndardyń kóbi habarsyz. Jańa apparat qyzyǵýshylyq týdyrǵanmen, turǵyndar onyń batyrmalaryn basyp qana qoıyp qoǵamdyq kólikti burynǵysha paıdalanýda.

Elorda ákimdiginiń keltirgen málimeti boıynsha qala qoǵamdyq kólikteri kún saıyn 875 myń jolaýshy tasymaldaıdy. Qalada 850 baǵdarlyq avtobýs qatynaıdy.