Jolaýshy tasymaldaýshylary vagondardaǵy aqaýlyqtardy joıý jóninde tapsyrma aldy
ASTANA. 2 shilde. QazAqparat - Óńirlik kóliktik baqylaý ınspektsııalary ótkizgen tekseristerdiń nátıjesinde birqatar tasymaldaýshylardyń qyzmetinde tısti talaptardy saqtamaý anyqtaldy.
Bul jaıynda QR Kólik jáne kommýnıkatsııa mınıstrliginiń málimetterinde aıtylǵan.
Bul is-sharalar kólik vedomstvosy basshysynyń blogyna azamattardan túsken shaǵymdardyń kóbeıip ketýine baılanysty QR KKM Kóliktik baqylaý komıtetiniń bastamasymen ótkizildi.
Anyqtalǵan kemshilikterdiń negizgileri - jyljymaly quramnyń jóndelýi men tehnıkalyq qyzmet kórsetý sapasynyń tómendigi, vagondardaǵy salqyndatý júıesindegi aqaýlyqtar, sanıtarlyq normalar men órt qaýipsizdigi talaptarynyń oryndalmaýy.
Mundaı buzýshylyqtar Almaty - Shymkent baǵytynda qatynaıtyn №59/60 jolaýshy poıyzyn tekserý nátıjesinde anyqtalǵan. Tasymaldaýshysy -«Qazaqstandyq kóliktik top» JShS. Oǵan 7 vagonda anyqtalǵan kemshilikterdi joıý jóninde nusqaý joldandy.
«Jolaýshy tasymaldary» AQ-nyń Qaraǵandy óńirlik ýchaskesin tekserý kezinde órtke qarsy belgi berý júıesi men jeldetý júıesiniń isten shyqqandyǵy saldarynan 3 vagon eksplýatatsııadan shyǵaryldy.
Sonymen qatar, osyndaı sebeptermen «Almaty - Astana» baǵytyndaǵy №3 jáne «Petropavl - Almaty» baǵytyndaǵy №16 jolaýshy poıyzdarynan 11 jolaýshy vagony aǵytylyp tastaldy.
Kóliktik baqylaý komıteti osy baǵyttaǵy jumysyn barlyq óńirlerde turaqty júrgizetin bolady. Jolaýshy vagondarynda aýany tazartý, jeldetý, órtke qarsy belgi berý júıeleriniń isten shyǵýy, sondaı-aq, sanıtarlyq normalardyń oryndalmaýy anyqtalǵan jaǵdaıda tasymaldaýshylarǵa tıisinshe sharalar qoldanylady.
Aǵymdaǵy jyldyń basynan beri kóliktik baqylaýdyń óńiraralyq ınspektsııalary 438 jolaýshy poıyzyn tekserdi. Onyń qorytyndysy boıynsha 331 bıletsiz jolaýshy men 7,6 tonna resimdelmegen júk anyqtalyp, olar poıyzdan túsirildi.
