Poıyzda jolaýshynyń jaǵdaıy nasharlasa, ne isteý kerek

ASTANA. KAZINFORM — «Jolaýshylar tasymaly» AQ poıyzda jolaýshy ózin jaısyz sezingen jaǵdaıda qandaı áreket jasaý qajet ekenin eske salady.

Kompanııa málim etkendeı, barlyq jolaýshylar poıyzynyń jolserikteri alǵashqy medıtsınalyq kómek kórsetý boıynsha arnaıy daıarlyqtan ótedi, al ár poıyz medıtsınalyq qobdıshamen jabdyqtalǵan.

Jol ústinde jolaýshynyń jaǵdaıy nasharlaǵan jaǵdaıda:

1. Vagon jolserigine dereý habarlaý qajet. Jolserik jolaýshynyń jaǵdaıyn baǵalap, óz quzyreti sheńberinde alǵashqy kómek kórsetedi.

2. Qajet bolǵan jaǵdaıda jolserik poıyz bastyǵyn habardar etedi. Poıyz bastyǵy qajetti sharalardy qabyldap, medıtsınalyq qyzmettermen baılanysty qamtamasyz etedi.

3. Shuǵyl jaǵdaı týyndasa, jedel járdem shaqyrylady. Qajet bolǵan jaǵdaıda poıyzdy jaqyn stantsııada medıtsına qyzmetkerleri qarsy alady nemese erekshe jaǵdaılarda belgilengen tártipke sáıkes jospardan tys toqtaý jasalýy múmkin.

4. Jeke dári-dármekterdi ózińizben birge alyp júrý usynylady. Sozylmaly aýrýlary bar jolaýshylar qajetti dárilerdi aldyn ala daıyndap, yqtımal qaýipter týraly jolserikti habardar etkeni jón.

— Poıyzdarda tótenshe jaǵdaılar turaqty túrde bolyp jatady jáne olar tek jolaýshynyń densaýlyǵynyń nasharlaýymen ǵana shektelmeıdi. Poıyz brıgadalarynyń tájirıbesinde túrli oqıǵalar kezdesedi, onyń ishinde sapar barysynda bosaný jaǵdaılary da bar. Sońǵy úsh jylda Ulttyq tasymaldaýshy poıyzdarynda jolserikter men poıyz bastyqtarynyń qoldaýymen shamamen 15 sábı dúnıege kelgen, — delingen habarlamada.

Ulttyq tasymaldaýshy jolaýshylardyń qaýipsizdigi men densaýlyǵy basty basymdyq ekenin atap ótip, olardy óz densaýlyǵyna muqııat qaraýǵa jáne ýaqtyly kómek suraýǵa shaqyrady. 

Budan buryn Óskemenge jolǵa shyqqan júkti kelinshek poıyzda qyz bosanǵanyn jazǵanbyz.