Jolaýshylaryna qyzmet kórsetpegen: FlyArystan men SCAT kompanııalary aıyppul arqalady
ASTANA. KAZINFORM – Jazǵy kezeńde reıster sanynyń ulǵaıýyna baılanysty QR zańnamasynda kózdelgen qyzmetterdi ýaqtyly kórsetpeý nemese reısti keshiktirý kezinde qyzmetterdi kórsetpeý týraly áýekompanııalarǵa jolaýshylardyń shaǵymdary jıilep ketti.
Osyǵan baılanysty, QR Kólik mınıstrliginiń Azamattyq avıatsııa komıteti reısterdiń keshigýi kezinde qyzmetterdi tıisinshe usyný bóliginde Qazaqstan Respýblıkasynyń qoldanystaǵy zańnamasynyń talaptaryn buzǵany úshin otandyq jáne sheteldik áýekompanııalardy jaýapkershilikke tartý boıynsha jumysty jalǵastyrýda.
«Máselen, Almaty — Qaraǵandy baǵyty boıynsha reıs kidirtilgen kezde qyzmetterdi usynbaýǵa baılanysty (jolaýshylar qonaq úıge ornalastyrylmady, sonymen qatar jolaýshylardy áýejaıdan qonaq úıge jáne keri tasymaldaý uıymdastyrylmady) aǵymdaǵy jyldyń 11 shildesinde „FlyArystan“ áýe kompanııasyna qatysty QR „Ákimshilik quqyq buzýshylyq týraly“ Kodeksiniń 567-babynyń 2-bóligi boıynsha ákimshilik quqyq buzýshylyq týraly hattama jasaldy, oǵan sáıkes áýe kompanııaǵa 1000 AEK (3 692 000 teńge) mólsherinde aıyppul salyndy.
Buǵan deıin, sondaı-aq Atyraý-Almaty baǵyty boıynsha reısti keshiktirgen kezde tıisti qyzmet kórsetpegeni úshin aǵymdaǵy jyldyń 24 maýsymynda «SCAT» áýe kompanııasy ákimshilik jaýapkershilikke tartylyp, aıyppul 1 000 AEK (3 692 000 teńge) qurady», — dep jazdy Kólik mınıstrliginen.
Jolaýshylardyń quqyqtaryn saqtaýǵa qatysty zańnamany múltiksiz saqtaý Azamattyq avıatsııa komıteti jumysyndaǵy basym baǵyttardyń biri bolyp tabylady jáne áýe kompanııalar tarapynan buzýshylyq faktileri anyqtalsa, belgilengen sharalar qoldanylatyndyǵyn atap ótken jón.
