Jolaýshylarǵa jańa múmkindik: Astana – Omby poıyzynyń vagondary jańardy
ASTANA.KAZINFORM — Astana – Omby baǵyty boıynsha júretin poıyz jańartyldy. Endi jolaýshylar jańa vagondarmen sapar shegip, jaıly ári qolaıly qyzmetti paıdalana alady. Bul týraly Kólik mınıstrligi málim etti.
Memleket basshysynyń jolaýshylar vagondary parkin keshendi jańartý jónindegi tapsyrmasyn oryndaý sheńberinde Qazaqstan Respýblıkasy Kólik mınıstrligi jolaýshylar tasymaly salasynda jyljymaly quramdy kezeń-kezeńimen jańǵyrtý jumystaryn júrgizip jatyr.
Saltanatty is-shara barysynda «Astana — Omby» halyqaralyq baǵyty boıynsha jolaýshylar poıyzynyń jańartylǵan quramy jolǵa shyqty.
Іs-shara barysynda Qazaqstan Respýblıkasy Kólik mınıstrligi Temirjol jáne sý kóligi komıtetiniń tóraǵasy Nurjan Kelbuǵanov:
— Baǵyttyń jańartylýy kórshiles elder arasyndaǵy kólik baılanysyn nyǵaıtýǵa jáne jolaýshylar úshin qoljetimdi ári jaıly jaǵdaı jasaýǵa baǵyttalǵan, — dep atap ótti.
Poıyz quramyna RWS Wagon (holdıng RWS KZ) bazasynda jasalǵan kýpe jáne platskart úlgisindegi 8 jańa otandyq vagon qosyldy. Bir baǵyttaǵy jalpy syıymdylyq 300-den astam jolaýshyny quraıdy.
Buǵan deıin halyqaralyq baǵyttarda jyljymaly quramdy jańartý jumystary «Almaty – Saratov», «Almaty – Novosıbırsk» jáne «Qaraǵandy – Máskeý» baǵyttarynda júrgizilgen bolatyn. Endi olardyń qataryna «Astana – Omby» baǵyty qosyldy.
— 2025 jyly 175 jańa jolaýshylar vagony satyp alyndy. 2026 jyly taǵy 191 vagon satyp alý josparlanýda. 2030 jylǵa deıin 800-ge jýyq vagon jańartylady, bul qoldanystaǵy parktiń 90%-yn aýystyrýǵa múmkindik beredi. Jańa vagondar zamanaýı talaptarǵa tolyq saı keledi, — delingen habarlamada.
Intereri merziminen erte tozýdy boldyrmaıtyn arnaıy materıaldardan jasalǵan, klımat-baqylaý jáne aýany zalalsyzdandyrý júıelerimen, USB-porttarmen jáne 220 V rozetkalarymen, Wi-Fi jelisimen,bıodárethanalarmen jabdyqtalǵan.
Aıta keteıik, 1 sáýirden bastap Ulytaý men Mańǵystaýdy jalǵaıtyn tikeleı poıyz qatynaı bastady.
