Jolaýshylardy zańsyz tasymaldaıtyn júrgizýshiler "Saıran" vokzalynyń problemasy bolyp tur
Jeksenbi kúni Almaty qalasyna jasaǵan jumys sapary aıasynda Kólik mınıstri Marat Qarabaev «Saıran» halyqaralyq avtovokzalyna bardy, dep habarlaıdy Kazinform.
Bas dırektor K.Mýkýjanova men bas ınjener A.Qýatbekov vedomstvo basshysyna kásiporynnyń jumysy týraly aıtyp berdi. Qazirgi ýaqytta nysan 57 baǵyt boıynsha qyzmet kórsetedi eken, onyń ishinde altaýy halyqaralyq baǵyttarda. Búgingi tańda ujymda 100-ge jýyq qyzmetker bar. Avtovokzalda kúnine shamamen 200 reıs júzege asyrylady.
Kásiporyn qyzmetindegi negizgi problemalyq másele – almatylyq bazarlardan kelip, jolaýshylardy zańsyz tasymaldaıtyn júrgizýshiler. Bul óz kezeginde memleketke orasan zor materıaldyq zııan jáne avtovokzaldar men avtostantsııalardyń, onyń ishinde jańa marshrýttardy ashý jónindegi jumystarǵa nuqsan keltiredi. Al zańsyz áreketterge qatysty baqylaýdyń bolmaýy jolaýshylar men jol qozǵalysyna qatysýshylardyń qaýipsizdigine qaýip tóndiredi.
Avtovokzal ókilderiniń aıtýynsha, zańsyz tasymaldaýshylarmen kúres keıbir normalardaǵy kemshin tustarǵa baılanysty tıimdi bolmaı otyr.Sondaı-aq avtobýs bıletterin qaıtarý erejelerin de ózgertý qajet.
«Elimizdiń ekonomıkalyq ósýiniń mańyzdy faktorlarynyń biri –kólik ınfraqurylymyn serpindi damytý jáne jetildirý bolyp tabylady. Sáıkesinshe, áleýmettik-ekonomıkalyq tirshiliktiń irkilissiz jumys isteýi úshin jetilgen ári básekege qabiletti jol-kólik ınfraqurylymy nysandarynyń bolýy aýadaı qajet. Sol sebepti atalǵan másele únemi nazarymyzda», dedi kólik mınıstri.
Ári qaraı Marat Kárimjanuly Almaty-1 jáne Almaty-2 temirjol vokzaldarynyń jumysyn baǵamdady. Sóz kezeginde M.Turysbekov pen E.Begdaırov 2019 jyldan bastap júzege asyrylǵanjáne obektilerdi jóndeý boıynsha 2024 jylǵa deıin josparlanǵan jumystar týraly baıandap berdi.
Jobalar sheńberinde Almaty-1 vokzalynda jańa ortalyq kondıtsıoner ornatylǵan. Sonymen birge poezdar kestesiniń tablosy aýystyrylyp, I, II jáne III joldardyń platformalaryna aǵymdaǵy jóndeý, múmkindigi shekteýli jandarǵa arnalǵan jańa lıftilerdi ornatý, dezınfektsııalaý, dezınsektsııalaý jáne deratızatsııalaý, jylytý júıelerin tazalaý júrgizilip, órt dabyly men órt sóndirý júıesiniń sorǵy stantsııasyn jóndeý jumystary júzege asyrylyp jatyr. Sondaı-aq 8 eskalatordy aýystyrý jáne vokzal ǵımaratyn, vokzal mańyndaǵy alańdy jáne qyzmettik avtoturaqty jóndeý jumystary josparlanyp otyr.
Almaty-2 vokzalynda perronǵa asfalt tóselip, órt qalqandary tolyq jasaqtalǵan. Órt gıdranttary aýystyrylyp, modýldik polıtsııa beketteri, jańa esikter men pandýstar ornatylǵan. Sondaı-aq sanıtarlyq toraptardy kúrdeli jóndeý jáne jylý trassasynyń qubyrlaryn aýystyrý, kassa ornalasqan zaldy jóndeý jumystary júzege asyrylyp, jańa aqparattyq tablo ornatylǵan. Kelesi jyly shatyrdy, №2 jáne 3 jolaýshylar platformalaryn jóndeý, sondaı-aq saýda zaly men kútý zalyndaǵy keramıkalyq plıtkalardy aýystyrý josparlanyp otyr.
Jumys saparynyń sońynda Marat Qarabaev Almaty qalasyndaǵy halyqaralyq áýejaıǵa bardy. Aktsıonerlik qoǵamynyń ókilderi mınıstrge ótken jyldyń naýryz aıynda bastalǵan jańa jolaýshylar termınalyn salý jobasynyń iske asyrylý barysy týraly aıtyp berdi. Jumystardy kelesi jyldyń shilde aıynda aıaqtaý josparlanyp otyr. Búgingi tańda joba 71 paıyzǵa daıyn. TAV Airports Holding jobaǵa 245 mıllıon dollardan astam ınvestıtsııa quıyp, onyń sheńberinde qazirgi termınaldy jetildirý jáne júrgizýshiler men jolaýshylardy barynsha qolaıly jaǵdaımen qamtamasyz etý úshin parkıng aımaǵyn qaıta qurý jumystary júrgizilip jatyr.
