Jolaýshylar vagondary parki tolyqtaı jańarady — QTJ
ASTANA. KAZINFORM — Búgin Úkimet otyrysynda elimizdegi temirjol salasyn damytý taqyryby qaraldy. Osy oraıda QTJ basshylyǵy 2030 jylǵa deıin jolaýshylar vagondarynyń parki tolyqtaı jańartylatynyn málim etti.
Іri jobalar
Qazir temirjol jelisiniń jalpy paıdalaný uzyndyǵy 16 myń shaqyrym. Degenmen tozý deńgeıi 57 paıyzdy qurady. Bul óz kezeginde poıyzdardyń qozǵalys jyldamdyǵyna áser etedi. Osy problemalardy sheshý úshin 2029 jylǵa deıin 5 myń km jańa jol qurylysy men jańartý jumystary atqarylýda. Sonymen qatar, 11 myń km joldyń jóndeý jumystary jasalyp jatyr. Qazir 5 joba boıynsha qurylys jumystary júrip jatyr: «Dostyq — Moıynty», «Almaty aınalma temirjoly», «Darbaza — Maqtaaral», «Moıynty — Qyzyljar» jáne «Baqty — Aıagóz». Osy jyly merziminen buryn eki iri joba aıaqtalady: «Dostyq — Moıynty» ýchaskesi jáne Almaty aınalma temirjoly. Kelesi jyly «Moıynty — Qyzyljar» jáne «Darbaza — Maqtaaral» jańa temirjoldary iske qosylady. Sonymen birge, bıyl 3 myń km temirjol ýchaskelerinde tolyq modernızatsııa bastaldy. Bul jumystar jańa joldardy salýmen teń.
— Óndiristik jáne qarjylyq kórsetkishterdiń turaqty ósýi baıqalyp otyr. Kompanııa negizgi maqsattarǵa jetý úshin júıeli jumysty jalǵastyryp keledi, — dedi «Qazaqstan temir joly» UK» AQ basqarma tóraǵasy Talǵat Aldybergenov.
Jyljymaly quram jańardy
Onyń aıtýynsha, bıyl 7 aıda 840 shaqyrym jol jóndeldi jáne bul jumys jalǵasady. Sonymen qatar, jyl basynan 51 lokomotıv, 56 jolaýshy vagony jáne 1 069 júk vagony satyp alyndy. Osy jyly jyljymaly quramdy jańartý jalǵasady. Bul óz kezeginde saladaǵy qyzmet kórsetý sapasyn jaqsartady. Qazir jolaýshylar vagondary parkiniń 74 paıyzynda paıdalaný merzimi 20 jyldan aspaǵan. Bul turǵyda QTJ jyljymaly quram parkin jańartýdyń baǵdarlamasyn qabyldady.
— 2030 jyldyń sońyna qaraı QTJ parki tolyqtaı jańartylady. Bul rette jańa vagondar paıda bolady. Olarda kondıtsıoner ornatylyp, múmkindigi shekteýli jandarǵa arnalǵan kýpeler jasaqtalady, — dedi QTJ basshysy.
T. Aldybergenov poıyzdardyń keshigýine temirjol jol jelisiniń tozýy áser etip otyrǵanyn aıtty.
— Bul másele bar. Biraq jolaýshylar qaýipsizdigi jáne jolaýshylar poıyzynyń kestesin saqtaý — bizdiń basty mindetimiz, ıaǵnı qaýipsizdikke erekshe ekpin qoıylǵan, — dedi ol.
Onyń aıtýynsha, qazir temirjoldyń tozýy 57 paıyzdy qurap otyr. Osyny eskere otyryp, iri kólemde jol jóndeý jumystary atqarylyp jatyr. Bul turǵyda qazir poıyzdar boıynsha keshigýdiń azaıýy 37 paıyzdy qurady.