Jolaýshylar tasymaly men vagondarǵa qatysty halyqtan aryz-shaǵym azaıǵan joq — Bektenov
ASTANA. KAZINFORM — Tasymaldaýshylar jolaýshylar vagondary men lokomotıv parkin júıeli túrde jańaryp otyrýyn qamtamasyz etýi qajet. Bul týraly Úkimet otyrysynda Premer-mınıstr Oljas Bektenov aıtty.
— Jolaýshylar tasymaly salasyna erekshe nazar aýdarý kerek. Qyzmet kórsetý sapasy men vagondardyń jaǵdaıyna qatysty halyqtyń tarapynan aryz-shaǵymdar azaıǵan joq. Bul temirjol salasymen qatar, elimizdiń ımıdjine áser etedi. Sondyqtan barlyq tasymaldaýshylar jolaýshylar vagondary men lokomotıv parkin júıeli túrde jańaryp otyrýyn qamtamasyz etýi qajet, — dedi ol.
Úkimet basshysynyń aıtýynsha, otandyq vagon jasaý zaýyttarynda qazirgi zamanǵa saı ári jaıly jolaýshylar vagondaryn shyǵarý jolǵa qoıylǵan. Olardy ulttyq tasymaldaýshy qoldanyp júr.
— Sondaı-aq júk vagondaryn shyǵarý jáne aýystyrý jumysyn da jandandyrý qajet. Budan bólek, Kólik mınıstrligi men Qazaqstan temir joly zamanaýı jáne perspektıvaly ázirlemelerdi engizý, jyljymaly quramdardyń qozǵalys jyldamdyǵyn arttyrý máseleleri boıynsha jumys isteýi qajet. Jolaýshylar tasymaly salasyndaǵy qyzmetterdi odan ári jetildirý boıynsha turaqty jumys júrgizý kerek, — dedi Oljas Bektenov.
Sonymen qatar Oljas Bektenov temir jol jobalaryn ýaqytyly paıdalanýǵa berýdi tapsyrdy.