Jolaýshylar tasymaly daýyna baılanysty ákim orynbasary men 9 sheneýnik jazalandy
ASTANA. KAZINFORM — Kólik prokýratýrasy oblysaralyq, qalaaralyq jáne aýdanishilik jolaýshylar tasymaly baǵyttaryna qyzmet kórsetý quqyǵyna arnalǵan konkýrstardyń zańdylyǵyn tekserdi.
Bas kólik prokýratýrasynyń málimetinshe, tekserý barysynda birqatar óńirde konkýrstyq rásimder kezinde tasymaldaýshylarǵa zańsyz kedergiler jasalǵany anyqtaldy. Sonymen qatar keıbir kompanııaǵa negizsiz artyqshylyq berilgen. Bul jaǵdaı zańnama talaptary men adal básekelestik qaǵıdattarynyń buzylýyna ákelgen.
— Prokýrorlyq qadaǵalaý sharalarynyń nátıjesinde 10 laýazymdy tulǵa tártiptik jaýapkershilikke tartyldy. Olardyń qatarynda oblys ákiminiń orynbasary jáne jergilikti atqarýshy organdardyń birqatar basshysy bar, — delingen habarlamada.
Ákim orynbasaryna qyzmetine tolyq sáıkes emestigi týraly eskertý jasalsa, qalǵan sheneýnikterge sógis jarııalandy.
Kólik prokýratýrasy jolaýshylar tasymaly salasynda zańdylyq pen ashyqtyqty qamtamasyz etý jumystary jalǵasatynyn málimdedi.
Eske salaıyq, buǵan deıin jyl basynan beri Memlekettik qyzmet isteri agenttigi memlekettik kórsetiletin qyzmetterdiń sapasyna 2 myńnan astam baqylaý júrgizip, 627 qyzmetkerdi jazalaǵanyn habarlaǵanbyz.
