Jolaýshylar tasymaldaý úlken jaýapkershilikti júkteıdi – qyzylordalyq maman
Qarapaıym halyq qoǵamdyq kólik qyzmetin paıdalanady. Sondyqtan kún uıasynan kóterilgen ýaqyttan bastap jolaýshylar tasymaldaý isimen aınalysatyn baǵdarly avtobýs júrgizýshilerine júkteletin mindet úlken. Qaınaǵan tirshiliktiń bel ortasynda júrgen qarapaıym eńbek adamdary qandaı qurmetke de laıyq. Olarǵa qandaı mindetter júkteledi? Osy oraıda Kazinform tilshisi «Qyzylorda Avtobýs parki» JShS óndiristik-tehnıkalyq qyzmet bóliminiń basshysy Erlan Sársenbaevty áńgimege tartqan edi.
– Keıingi jyldarda Qyzylorda qalasynda avtobýs jaǵdaıy jaqsara tústi. Bul baǵytta qandaı is-sharalar júzege asty?
– Oblys basshylyǵynyń qoldaýymen qalaǵa sońǵy úlgidegi avtobýstar kelip jatyr. Bul avtobýs jetispeýshiligin azaıtty. Turǵyndar úlken syıymdylyqtaǵy qoǵamdyq kólikpen dittegen jerine ýaqytyly jetetin boldy. Oǵan qosa, burynǵydaı avtobýsty jıi jóndep áýrege túspeımiz. Endigi mindetimiz – jańadan kelgen qoǵamdyq kólikterdi jıi-jıi tekserip, taza ustaýǵa tyrysamyz.
Aıta keterligi, qazir «Qyzylorda Avtobýs parkine» qarasty barlyq qoǵamdyq kólikte elektrondy tólem qondyrǵysy ornatylǵan. Turǵyndar tarapynan sol júıe boıynsha jolaqy tóleýshiler qatary artyp keledi. Óz jumysyma rızamyn. Mańdaı termen tapqan tabysyma otbasymdy asyrap, halyq alǵysyn alyp júrgen jaıymyz bar.
– Avtobýs júrgizýshilerine qandaı talaptar qoıylady? Jumys qaı ýaqyttan bastalady?
– Avtobýs júrgizýshileri tańǵy saǵat 5-ten bastap arnaıy medıtsınalyq tekseristen ótedi. Sodan keıin baryp óz jumysyna kirisedi. Óıtkeni, adam ómiri úshin barlyǵymyz jaýaptymyz. Sol sebepti árbir avtobýs júrgizýshisin medıtsınalyq tekseristen ótkizý óte mańyzdy. Odan keıin avtobýstyń tehnıkalyq jaǵdaıy tekseriledi. Kelesi kezekte olar jolǵa shyǵyp, óz mindetin atqarady.
– Qazir halyqtyń qoǵamdyq kólikke otyrý mádenıeti qandaı?
– Burynǵy jyldarda buǵan baılanysty túsinbeýilik jaǵdaıy kezdesetin. Búginde halyqtyń qoǵamdyq kólikke otyrý mádenıeti qalyptasqan. Avtobýsta balaǵat sózder kóp aıtylmaıdy. Jol aqysyn ýaqytyly tóleıdi. Keıde turǵyndar óz alǵysyn aıtyp, rızashylyǵyn bildiredi. Biz sekildi kólik júrgizýshileri úshin halyq alǵysynan artyq marapat joq.
– Jolaýshylardy tasymaldaý qaı ýaqytqa deıin sozylady?
– Keshke deıin bekitilgen baǵyt boıynsha júrip, turǵyndardy tasymaldaımyz. Kólik júrgizýshisi qarapaıym sekildi kórinýi múmkin. Alaıda onda turaqty jumys isteý ońaı emes. Sebebi halyqpen tyǵyz qyzmet etý úlken jaýapkershilikti júkteıdi.
Men 1988-1993 jyldary Qaraǵandy qalasyndaǵy polıtehnıkalyq ınstıtýtynda mashına jasaý tehnologııasy boıynsha bilim aldym. Eńbek jolymdy 1993 jyly «Rısmash»-JShS-y mekemesinde ınjener-konstrýktor retinde bastadym. Odan beri birneshe mekemelerde osy sala boıynsha qyzmet etip júrdim. Qazirgi tańda «Qyzylorda Avtobýs parki» JShS mekemesinde óndiristik tehnıkalyq qyzmet bóliminde jumys isteımin.
– Áńgimeńizge raqmet.
