Jolaýshylar shaǵymynan keıin Aqtóbe — Mańǵystaý poıyzynyń vagondary jańartyldy

ASTANA. KAZINFORM — Osy ýaqytqa deıin atalǵan vagondardyń tehnıkalyq jaı-kúıine qatysty halyq tarapynan kóptegen shaǵym túsken. 

Kólik mınıstrligi № 109/110 «Aqtóbe — Mańǵystaý» baǵyty boıynsha jolaýshylar temirjol qatynasy qaıta jandanǵanyn málim etti. Atalǵan baǵyt boıynsha buǵan deıin «Otpan Logistik» JShS jeke tasymaldaýshysy qyzmet kórsetip kelgen. 

Vagondardyń tehnıkalyq jaı-kúıine qatysty halyq tarapynan kóptegen shaǵym túsýine baılanysty, sondaı-aq jyljymaly quramdy jańartý jónindegi mindettemelerdiń oryndalmaýyna oraı kompanııamen jasalǵan kelisimshart buzyldy.

Qazir jolaýshylar tasymaly Ulttyq tasymaldaýshy — «Jolaýshylar tasymaly» AQ quramyndaǵy poıyzdarmen júzege asyrylyp jatyr.

— Poıyz otandyq óndiriste shyǵarylǵan jańa jolaýshylar vagondarymen qamtamasyz etilgen. Poıyz quramynda 5 kýpe jáne 6 platskart vagony bar. Bir baǵyttaǵy jalpy syıymdylyǵy 400-den astam jolaýshyny quraıdy. Vagondar qaýipsizdik jáne jaılylyq boıynsha zamanaýı talaptarǵa tolyq sáıkes keledi. Kýpe vagondary ergonomıkalyq oryndarmen, jeke jaryqdıodty shamdarmen, USB-porttarmen jáne elektr rozetkalarymen jabdyqtalǵan. Erekshe qajettiligi bar jolaýshylar úshin arnaıy kýpeler, múgedekter arbasyn ornalastyrýǵa arnalǵan oryndar jáne jolserikti shaqyrý túımesi qarastyrylǵan, — delingen habarlamada.

Kólik mınıstrligi áleýmettik mańyzy bar baǵyttarda turaqty jolaýshylar qatynasyn qamtamasyz etý jáne jolaýshylar parkin kezeń-kezeńimen jańartý boıynsha júıeli jumysty jalǵastyrady.

Budan buryn QTJ tas joldardyń jabylýyna baılanysty jolaýshylardy tasymaldaý úshin 13 poıyzdy iske qosqanyn habarlady.