Jolaýshylar poıyzdaryn jańartý deńgeıi qalaı
ASTANA. KAZINFORM — «Qazaqstan temir joly» ulttyq kompanııasy elimizde jolaýshylar vagondary men lokomotıv tapshylyǵy qalaı sheshilip jatqany boıynsha aqparat berdi.
- «Jolaýshylar tasymaly» AQ bekitilgen josparlarǵa sáıkes, jyljymaly quram parkin júıeli túrde jańartyp keledi. Qazirgi ýaqytta kompanııanyń vagon parkinde 2 171 vagon bar. Onyń ishinde 1 951 vagon jolaýshylar tasymalyna arnalǵan, al qalǵan 220-sy tehnıkalyq, júk, meıramhana jáne basqa da vagon sanatynda. Jolaýshylar tasymaly salasyndaǵy qyzmet sapasyn arttyrý úshin ınfraqurylymdy jáne jyljymaly quramdy jańartý boıynsha keshendi jumystar atqarylyp jatyr, - delingen QTJ-nyń Kazinform agenttigine bergen jaýabynda.
Kompanııa aqparatyna qaraǵanda, 2014-2024 jyldar aralyǵynda 1 046 jańa vagon satyp alynyp, kóptegen jolaýshylar poıyzdary jańartyldy. Onyń ishinde 2024 jyly Petropavl qalasyndaǵy otandyq zaýytta óndirilgen 118 jańa vagon paıdalanýǵa berildi. Keıingi 10 jylda júrgizilgen bul sharalar nátıjesinde jolaýshylar vagondary parki 50 paıyzdan astam deńgeıde jańartyldy.
Sonymen qatar, qazirgi kezde «QTJ-Jolaýshylar lokomotıvteri» JShS-da jolaýshylardy tasymaldaýǵa arnalǵan 201 lokomotıv bar.
- 2025 jyly seriktestik 12 lokomotıv, al 2026 jyly 24 lokomotıv satyp alýdy josparlady, osylaısha lokomotıvterdiń jolaýshylar qozǵalysyna tolyq qajettiligi qamtamasyz etiledi, - dep atalyp ótken QTJ aqparatynda.
Eske salsaq, byltyr jeltoqsan aıynyń aıaǵynda Kólik mınıstri Marat Qarabaev Qazaqstandaǵy jalpy lokomotıvterdiń tozý deńgeıi 61 paıyz bolǵanyn aıtty. Sonymen qatar ol júk tasymaldaıtyn vagondar jetkilikti ekenin atap ótti.