Jolaýshylar poıyzdary 412 saǵatqa keshikken – aýdıt

ASTANA. KAZINFORM – Májiliste Joǵary aýdıtorlyq palata tóraǵasy Álıhan Smaıylov kólik salasyn damytýǵa bólingen bıýdjet qarajatyna jasalǵan aýdıt nátıjesin baıandaýda.

Spıkerdiń aıtýynsha, ondaǵan jyldar boıy jınalǵan máselelerdi sheshýdiń ornyna kóbine jyrtyqty jamaý jumystary júrgen.

«23 obektide 3 trln teńgeni qamtıtyn aýdıt júrgizildi. Nátıjesinde 29 mlrd teńgege qarjylyq buzýshylyqtar, 168 mlrd teńgege bıýdjet qarajatynyń tıimsiz josparlanǵany jáne tıimsiz paıdalanylǵany anyqtaldy. Ekonomıkalyq shyǵyndar men jiberip alǵan paıda 307 mlrd teńgeni qurady. Aýdıt qorytyndysy boıynsha 5 materıal quqyq qorǵaý organdaryna joldandy. 117 materıal ákimshilik jaýapqa tartý úshin jiberildi», - dedi Á. Smaıylov.

Sońǵy tórt jylda temirjol salasyn damytýǵa shamamen 2 trln teńge, sonyń ishinde bıýdjet qarajaty esebinen 332 mlrd teńge jumsalǵan. Qomaqty qarajat bólingenine qaramastan, bul ekonomıkanyń júkter men jolaýshylardy tasymaldaý qajettiligin úzdiksiz jáne sapaly qamtamasyz etý úshin jetkiliksiz bolyp shyqty.

«Saldarynan temirjol jelileri, lokomotıvter, vagondar ábden tozǵan. Tek 2023 jyldyń ózinde jolaýshylar poıyzdarynyń keshigýi 412 saǵatty qurady nemese 2022 jylmen salystyrǵanda 5 ese ósken. Kezinde ózin-ózi qamtamasyz etken kompanııa tıimsiz jáne konservatıvti basqarý, memleket ıeliginen durys oılastyrylmaı shyǵarý saldarynan búginde áreń kún kórýde», - dedi aýdıtorlyq palata tóraǵasy.