Jolaýshylar nazaryna: Almaty áýejaıynda asfalt jabyny jańartylyp jatyr
ALMATY. KAZINFORM – Búgin Almaty áýejaıynyń aýmaǵynda asfalt jabynyn tegisteý jáne jańartý jumystary bastaldy.
Almaty áýejaıynyń málimetinshe, atalǵan jumystar 4 kún jalǵasady jáne jol ınfraqurylymyn jaqsartý maqsatynda júzege asyrylady.
- Áýejaı aýmaǵynda qatynaý yńǵaıly bolýy úshin jol ınfraqurylymy jańartylyp jatyr. Avtokólikterge kirý jáne shyǵý qozǵalysy tolyq qamtamasyz etiledi. Ýaqytsha qolaısyzdyqtar úshin keshirim suraımyz, – dep habarlady áýe aılaǵynyń baspasóz qyzmeti.
Eske salaıyq, buǵan deıin Almaty áýejaıynyń T2 termınalynyń ushý qabatynda, pasporttyq baqylaý aımaǵyna jaqyn jerde, ǵımarat tóbesinde jóndeý jumystary bastaldy. Jumystar 10 kún boıy tańǵy 9:00-den keshki 19:00-ge deıin júrgizildi.
Sondaı-aq qazir áýejaıdyń ishki termınalynda jańǵyrtý jumystary júrgizilip jatyr. Almaty ákiminiń orynbasary Oljas Smaǵulovtyń aıtýynsha, atalǵan jumystar shilde aıynda aıaqtalýy tıis. Joba aıasynda ishki termınaldyń ótkizý qabileti jylyna 3 mıllıonnan 7 mıllıon jolaýshyǵa deıin ulǵaıady. Sonymen qatar 1500 oryndyq jabyq kópdeńgeıli avtoturaq salynyp jatyr.
