Jolaýshylar aǵyny boıynsha kóshbasshy áýejaılar belgili boldy
ASTANA. KAZINFORM — Jalpy tizimge Eýropadan tek eki áýejaı engenimen, halyqaralyq reısterde eń kóp jumys isteıtin bes áýejaı bar, dep habarlaıdy Euronews.
AQSh-taǵy Atlanta qalasyndaǵy Hartsfıld–Djekson halyqaralyq áýejaıy álemdegi eń júktemesi kóp, qarbalas áýejaı mártebesin saqtap qaldy: 2025 jyly ol arqyly 106 mıllıonnan astam jolaýshy ótken.
Jolaýshylar aǵyny boıynsha ekinshi oryndy Birikken Arab Ámirlikterindegi Dýbaı halyqaralyq áýejaıy ıelense, úshinshi orynda — Tokıonyń Haneda áýejaıy, tórtinshi — AQSh-tyń Tehas shtatyndaǵy Dallas/Fort-Ýert halyqaralyq áýejaıy, besinshi — Qytaıdaǵy Shanhaı Pýdýn halyqaralyq áýejaıy.
Reıtıngti Airports Council International (ACI) World uıymy daıyndaǵan. Ol ushyp ketken jáne kelgen jolaýshylar sanyna negizdelgen, al tranzıttik jolaýshylar tek bir ret esepke alynǵan.
Atlanta áýejaıy kóshbasshylyǵyn saqtaǵanymen, onyń jolaýshylar aǵyny 2024 jylmen salystyrǵanda 1,6%-ǵa, al 2019 jylmen salystyrǵanda 3,8%-ǵa azaıǵan.
Azııa-Tynyq muhıty aımaǵyndaǵy áýejaılar COVID-19 pandemııasynyń saldarynan áli de qalpyna kele almaı otyr. Tokıonyń Haneda áýejaıy 2024 jylmen salystyrǵanda bir satyǵa, al 2019 jylmen salystyrǵanda eki satyǵa joǵarylaǵan. Shanhaı Pýdýn áýejaıy 10-orynnan 5-orynǵa kóterilip, 2019 jylǵy (8-oryn) kórsetkishinen asyp tústi. Al Gýanchjoý Baııýn áýejaıy 2022 jylǵy 57-orynnan 2025 jyly 9-orynǵa deıin kóterildi.
— Álemdegi eń qarbalas áýejaılardy ósip kele jatqan áýe tasymaly suranysyn kúrdeli jaǵdaıda tıimdi basqarǵany úshin quttyqtaımyz.
Bul iri toraptyq áýejaılar adamdar men júkterdiń qozǵalysyn qamtamasyz etip, óz qalalary men óńirlerinde saýda, týrızm jáne ekonomıkalyq ósimdi qoldaıdy.
Ósip jatqan suranysqa ilesý úshin úkimet áýejaılarǵa jáne jalpy avıatsııa salasyna uzaq merzimdi ınvestıtsııalardy basymdyqqa qoıýy qajet, — dedi ACI World bas dırektory Djastın Erbachchı.
2025 jylǵy Eýropadaǵy eń qarbalas áýejaılar
2025 jyly jolaýshylar sany boıynsha álemdegi eń qarbalas 10 áýejaıdyń qataryna Eýropadan tek eki áýejaı endi.
Londondaǵy Hıtroý áýejaıy 2025 jyly 84 482 126 jolaýshyǵa qyzmet kórsetip, 2024 jylǵy 5-orynnan 7-orynǵa tómendedi.
Odan keıin Ystanbul áýejaıy ornalasqan: 2025 jyly ol arqyly 84 437 710 adam ótken. Reıtıngte ol 7-orynnan 8-orynǵa túskenimen, 2019 jylmen salystyrǵanda aıtarlyqtaı ósim kórsetti (ol kezde 28-orynda bolǵan).
2025 jylǵy eń qarbalas áýejaılar TOP-10 (jalpy jolaýshylar sany boıynsha):
Atlanta (AQSh) — Hartsfıld–Djekson halyqaralyq áýejaıy
Dýbaı (BAÁ) — halyqaralyq áýejaı
Tokıo (Japonııa) — Haneda áýejaıy
Dallas/Fort-Ýert (AQSh) — halyqaralyq áýejaı
Shanhaı (Qytaı) — Pýdýn halyqaralyq áýejaıy
Chıkago (AQSh) — O’Hara halyqaralyq áýejaıy
London (Ulybrıtanııa) — Hıtroý áýejaıy
Ystanbul (Túrkııa) — áýejaı
Gýanchjoý (Qytaı) — Baııýn halyqaralyq áýejaıy
Denver (AQSh) — halyqaralyq áýejaı
Halyqaralyq áýe tasymaly qarqyndy ósip otyr
Jalpy alǵanda, 2025 jyly halyqaralyq jolaýshylar aǵyny 4 mıllıard adamǵa jetip, 2024 jylmen salystyrǵanda 5,9%-ǵa, al 2019 jylmen salystyrǵanda 8,3%-ǵa artty.
Jalpy eń qarbalas áýejaı bolyp Atlanta qala bergenimen, halyqaralyq jolaýshylar sany boıynsha Dýbaı kósh bastap tur: 95 192 160 adam osy áýejaı arqyly ushyp kelgen nemese ketken. BAÁ aýmaǵynyń shaǵyndyǵyna baılanysty el ishinde ishki reıster oryndalmaıdy.
Londondaǵy Hıtroý áýejaıy halyqaralyq tasymal boıynsha 79 874 784 jolaýshymen ekinshi orynda. Bul rette ótken jyly shamamen 4,6 mıllıon adam onyń ishki reısterin paıdalanǵan.
Úshinshi orynda — Ońtústik Koreıadaǵy Inchhon halyqaralyq áýejaıy (Seýl qalasyna qyzmet kórsetedi), tórtinshi — Sıngapýrdaǵy Changı áýejaıy.
Besinshi oryndy Nıderlandtaǵy Amsterdam Shıphol áýejaıy ıelendi, ol arqyly 68 767 548 halyqaralyq jolaýshy ótken.
Halyqaralyq jolaýshylar sany boıynsha TOP-10-ǵa sondaı-aq Ystanbul (6-oryn), Parıjdegi Sharl de Goll (7-oryn) jáne Frankfýrt (9-oryn) áýejaılary da kirdi.
2025 jylǵy halyqaralyq jolaýshylar sany boıynsha eń qarbalas áýejaılar TOP-10:
Dýbaı (BAÁ) — halyqaralyq áýejaı
London (Ulybrıtanııa) — Hıtroý áýejaıy
Inchhon (Ońtústik Koreıa) — halyqaralyq áýejaı
Sıngapýr — Changı áýejaıy
Amsterdam (Nıderland) — Shıphol áýejaıy
Stambul (Túrkııa) — áýejaı
Parıj (Frantsııa) — Sharl de Goll áýejaıy
Gonkong — halyqaralyq áýejaı
Frankfýrt (Germanııa) — áýejaı
Doha (Qatar) — Hamad halyqaralyq áýejaıy
ACI World málimetinshe, bir jyl ishinde avıatsııalyq janarmaı baǵasy 13%-ǵa tómendegen. Sonymen qatar ınflıatsııalyq qysym da álsirep, bul halyqtyń satyp alý qabiletin qoldap, áýe saparlaryna turaqty suranysty qamtamasyz etken.
Aıta ketelik Astana áýejaıy reıster kestesin ýaqytsha ózgertedi.
