Poıyzdan qalyp qoıǵan jaǵdaıda bılet qunyn qalaı qaıtaryp alýǵa bolady

ASTANA. KAZINFORM — Jolaýshylar úshin poıyzǵa úlgermeı qalý — jıi kezdesetin qolaısyz jaǵdaılardyń biri. Osyǵan baılanysty «Jolaýshylar tasymaly» AQ poıyzdan qalyp qoıǵan jaǵdaıda qandaı áreket jasaý kerektigin eske saldy.

— Eń aldymen vokzaldaǵy bılet kassasyna júginip, týyndaǵan jaǵdaı týraly kassırge habarlaý qajet. Eger jolaýshy poıyzǵa úlgermeı qalsa, bılet qunynyń bir bóligin qaıtaryp alý múmkindigi qarastyrylǵan, — delingen habarlamada.

Bul úshin ótinishti bılette kórsetilgen stantsııadan poıyz jónelgennen keıin bir saǵattan keshiktirmeı rásimdeý qajet.

— Qaıtarý rásimin júrgizý úshin jolaýshy jeke kýáligi men bıletin usynýy tıis. Kassır qajetti qujattardy rásimdep, bos oryn bolǵan jaǵdaıda kelesi poıyzǵa otyrýdyń balama nusqalaryn usyna alady. Bılet qunyn qaıtarý kólemi men merzimi jolaýshylardy, júk pen bagajdy, sondaı-aq poshta jóneltilimderin temirjol kóligimen tasymaldaý qaǵıdalaryna sáıkes aıqyndalady, — dep túsindirdi «Jolaýshylar tasymaly» AQ baspasóz qyzmeti.

Mundaı jaǵdaılarda jolaýshylarǵa qosymsha aqparat alý úshin 1433 nómiri boıynsha habarlasa alady sondaı-aq vokzaldyń anyqtama qyzmetine júginýge bolady. 

«Jolaýshylar tasymaly» AQ jolaýshylarǵa osyndaı jaǵdaılardan saqtaný úshin vokzalǵa erterek kelýdi usynady. 

Eske sala keteıik, buǵan deıin Ramazan aıynda poıyzdardaǵy vagon-restorandar arnaıy kestege kóshkenin jazǵan edik.