Jolaýshy az, shyǵyn kóp: Túrkistandaǵy áýejaı senimgerlik basqarýǵa beriledi
TÚRKІSTAN. KAZINFORM — Búginde Túrkistan halyqaralyq áýejaıy Túrkistan oblysy ákimdiginiń kommýnaldyq menshiginde.
Túrkistandaǵy halyqaralyq áýejaıdyń qarjylyq kórsetkishteri qazirgi tańda nátıje bermeı keledi. Jolaýshylar aǵyny men júk aınalymynyń tómen bolýy áýejaıdyń qarjylyq shyǵyndaryn aqtamaı otyr. Osyǵan baılanysty áýejaıdy senimgerlik basqarýǵa berý týraly sheshim qabyldanǵan.
Túrkistan oblysy jolaýshylar kóligi jáne avtomobıl joldary basqarmasynyń málimetinshe, áýejaıdy senimgerlik basqarýǵa berý arqyly onyń ınfraqurylymyn damytý, halyqaralyq baǵyttardy keńeıtý jáne ekonomıkalyq tıimdiligin arttyrý kózdelgen. Bul maqsatta bastapqyda vetnamdyq «Sovico Group» kompanııasymen memorandým túzilgen bolatyn. Alaıda áýejaıdy damytý boıynsha qoıylǵan talaptarmen atalǵan kompanııa kelispegen.
Búginde otandyq «Alpha Sky» áýe kompanııasymen kelissózder júrgizilip jatyr. Kompanııaǵa qoıylatyn talaptardyń qatarynda jańa áýe baǵyttaryn ashý, týrıstik jáne jolaýshylar aǵynyn ulǵaıtý, júk tasymaly kólemin arttyrý, sondaı-aq úsh jyl ishinde áýejaıdy tabysty nysanǵa aınaldyrý mindetteri qarastyrylǵan. Kelissózder nátıjesinde Túrkistan halyqaralyq áýejaıyn 10 jyl merzimge senimgerlik basqarýǵa berý josparlanyp otyr.
— Túrkistan halyqaralyq áýejaıyndaǵy jolaýshylar aǵyny men júk aınalymy dınamıkasynyń az bolýynan atalǵan nysan óz shyǵyndaryn jappaı otyr. Sondyqtan áýejaıdy senimgerlik basqarýǵa berý boıynsha kelissózder júrgizilip jatyr. Bul rette áýejaıdy senimgerlik basqarýǵa berý arqyly aldaǵy úsh jyl ishinde onyń tabystylyǵyn qamtamasyz etý kózdelgen, — delingen basqarma taratqan resmı habarlamada.
Qazirgi ýaqytta Túrkistan halyqaralyq áýejaıynda 4 halyqaralyq baǵyt boıynsha (Ystanbul, Kýveıt, Abý-Dabı, Samarqand) jáne 7 ishki baǵyt boıynsha (Astana, Almaty, Aqtaý, Aqtóbe, Oral, Qostanaı jáne Qaraǵandy) turaqty áýe qatynasy qamtamasyz etilip keledi.
Aıta keteıik, budan buryn áýejaıda qandaı sózderdi aıtýǵa bolmaıtyndyǵyn jazǵan bolatynbyz.