Jolaýshy apatty shyǵý esigin ózi ashqan: Air Astana shyǵyndy óteý talabymen sotqa júgindi

QYZYLORDA. KAZINFORM — Qyzylorda qalalyq sotyna «Air Astana» AQ jaýapkerden 23 mln teńgege jýyq shyǵyndy óteý talabymen júgindi. Bul týraly atalǵan vedomstvonyń baspasóz qyzmeti habarlady. 

Belgili bolǵandaı, «Air Astana» ushaǵy Astana-Almaty baǵyty boıynsha reısin oryndap, trapqa deıin kútip turǵan kezde jaýapker apatty shyǵý esigin óz betinshe ashqan.

— Apatty shyǵý esikteri tek tótenshe jaǵdaılarda jáne ekıpajdyń buıryǵy boıynsha ǵana paıdalanylady. Apatty shyǵý esigin ashý jáne evakýatsııalyq úrlemeli trapty iske qosý nátıjesinde talap qoıýshyǵa materıaldyq shyǵyn kelip, trapty aýystyrý qajettiligi týyndaǵan. Aýystyrý quny 22 995 936 teńge. Sot taraptarǵa daýdy tatýlastyrý rásimderi arqyly retteý jónindegi quqyqtaryn túsindirip, kelisim jasaýǵa merzim bergen. Berilgen merzimde taraptar ózara kelisimge kelgenin kórsetip, medıatsııalyq kelisimdi bekitýdi suraǵan. Kelisimshartqa sáıkes jaýapker talap qoıýshyǵa 6 698 426 teńge ótemaqyny 2025 jyldyń 20 qarashasyna deıin tóleýge mindettelgen. Talap qoıýshy óz kezeginde 22 995 936 teńgeni óndirý talabynan bas tartqan, — delingen habarlamada. 

Sot uıǵarymymen taraptar arasyndaǵy medıatsııalyq kelisim bekitilip, is júrgizý toqtatyldy.

Jýyrda Qylmystyq ister jónindegi kassatsııalyq sot kámeletke tolmaǵandardyń isteri jónindegi mamandandyrylǵan aýdanaralyq sotynyń úkimin jáne Qyzylorda oblystyq sotynyń qylmystyq ister jónindegi sot alqasynyń qaýlysyn zańdy ári negizdi dep tapty.