Jolaman aýylynda nóser saldarynan birneshe kósheni sý basty - Almaty oblysy
TALDYQORǴAN. QazAqparat - Almaty oblysynyń Jolaman aýylynda qatty jaýyn saldarynan birneshe kósheni sý basty, dep habarlaıdy QazAqparat tilshisi.
Almaty oblysy TJD baspasóz qyzmetiniń málimetinshe, 2021 jylǵy 15 tamyzda shamamen saǵat 14.30-da Almaty oblysy Kerbulaq aýdany Jolaman aýylynda nóser jańbyr jaýyp, saldarynan Jolaman aýylynyń shetindegi birneshe kósheler men avtojoldardy sý basty.
Zardap shekkender jáne qıraýlar joq. Qazirgi ýaqytta jańbyr toqtap, sý deńgeıi tómendedi, jaǵdaı turaqtandy.
Esterińizge sala keteıik, 14 tamyzda Almaty oblysy Tótenshe jaǵdaılar departamenti 15-16 tamyzda Almaty oblysynyń taýlarynda jáne taýly aýdandarynda qatty jańbyr jaýady degen boljamǵa baılanysty ózenderde sý deńgeıiniń kóterilýi jáne kólbeý aǵyndardyń qalyptasýy kútilip otyrǵany týraly SMS-habarlama, «Dármen» mobıldi qosymshasy, áleýmettik jeliler, sondaı-aq BAQ arqyly daýyldy eskertý taratqan bolatyn.
