Jol júrisi qaǵıdalary ózgerdi: júrgizýshiler neni bilýi kerek
ASTANA. KAZINFORM – Qazaqstanda jol júrisi qaǵıdalaryna birqatar ózgeris engizildi. Jańa talaptar jol qozǵalysy qaýipsizdigin kúsheıtýge, jol-kólik oqıǵalarynyń aldyn alýǵa jáne júrgizýshilerdiń jaýapkershiligin arttyrýǵa baǵyttalǵan. Bul týraly Óńirlik kommýnıkatsııalar qyzmetinde ótken brıfıngte Astana qalasy Polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Nurlan Ývaev aıtty.
Jańa kameralar qandaı quqyq buzýshylyqty tirkeıdi
Nurlan Ývaevtyń aıtýynsha, bıyl naýryz aıynan bastap Astanada «Sergek» júıesimen qatar «Presight AL LTD» kompanııasynyń ıntellektýaldy beınebaqylaý keshenderi jumys isteı bastady.
– Jańa keshenderdi kezeń-kezeńimen engizý barysynda qaýipsizdik beldigin taqpaı kólik basqarýdyń 20 myńnan astam deregi, kólik júrgizý kezinde uıaly telefon paıdalanýdyń shamamen 2,5 myń jaǵdaıy jáne júrgizýshilerdiń jaıaý júrginshilerge jol bermegen 127 deregi anyqtaldy, – dedi ol.
Onyń sózinshe, jańa keshender jol erejesin buzýdyń 15 túrin avtomatty túrde anyqtaı alady. Qazir júıeni keńeıtý jumystary jalǵasyp jatyr. Sonymen birge jańa kameralar jańa aıyppul engizbeıdi. Olar zańda jaýapkershilik kózdelgen quqyq buzýshylyqtardy ǵana avtomatty túrde tirkeıdi.
«Vafeldi» qıylysta qandaı talap saqtalýy kerek
Spıkerdiń aıtýynsha, «vafeldi» jol tańbasy bar qıylystardyń basty maqsaty – kólik keptelisin boldyrmaı, qozǵalystyń úzdiksiz júrýin qamtamasyz etý.
– Júrgizýshi qıylysqa ony toqtamaı tolyq kesip óte alatynyna kózi jetkende ǵana kirýge tıis. Eger alda keptelis bolyp, qıylysta toqtap qalý qaýpi bolsa, qıylysqa kirýge bolmaıdy, – dedi Nurlan Ývaev.
Bul talapty buzǵandarǵa Ákimshilik quqyq buzýshylyq týraly kodekstiń 594-babynyń 1-bóligine sáıkes 3 aılyq eseptik kórsetkish mólsherinde aıyppul salynady.
Elektr samokattaryna qatysty qandaı talaptar ózgerdi
Nurlan Ývaevtyń aıtýynsha, 1 shildeden bastap elektr samokattaryn paıdalanýǵa qatysty jańa talaptar kúshine endi.
Jalǵa beriletin (kıksherıngtik) elektr samokattaryna mindetti memlekettik tirkeý engizildi. Endi olardy tek A1, A nemese V sanatyndaǵy júrgizýshi kýáligi bar azamattar ǵana basqara alady.
– 25 tamyzdan bastap elektr samokattarynyń trotýarlarmen jáne jaıaý júrginshiler jolymen júrýine tyıym salynady. Olar velosıped jolymen, al ondaı jol bolmaǵan jaǵdaıda joldyń oń jaq jıegimen júrýge tıis, – dedi ol.
Sondaı-aq saǵatyna 50 shaqyrymnan joǵary jyldamdyqpen júretin motovelosıpedter mopedterge teńestirilip, mindetti memlekettik tirkeýden ótedi. Elektr samokattary men motovelosıpedterdi basqarǵan kezde qorǵanysh quraldary men jaryq shaǵylystyratyn elementterdi paıdalaný mindetti.
Spıkerdiń sózinshe, qazir «Sergek» kompanııasymen birlesip, jol erejesin buzǵan elektr samokattaryn memlekettik tirkeý nómiri arqyly avtomatty túrde anyqtaıtyn júıe engizilip jatyr.
– Birinshi jartyjyldyqta elordada motovelosıped júrgizýshileriniń kinásinen 8, al elektr samokattaryn paıdalanýshylardyń kinásinen 14 jol-kólik oqıǵasy tirkelgen. Reıd barysynda jeke mobıldilik quraldaryn paıdalanǵan 6 myńnan astam adam tekserilip, olardyń 5 myńnan astamy ákimshilik jaýapkershilikke tartylǵan, – dedi Nurlan Ývaev.
65 jastan asqan júrgizýshilerge qandaı talap qoıylady
Nurlan Ývaevtyń aıtýynsha, 25 tamyzdan bastap 65 jastan asqan júrgizýshiler men múgedektigi bar júrgizýshiler eki jyl saıyn mindetti medıtsınalyq tekserýden ótedi.
Medıtsınalyq tekserýden ótkeni týraly málimet Densaýlyq saqtaý mınıstrligi men Іshki ister mınıstrliginiń aqparattyq júıeleri arasynda avtomatty túrde almasady. Eger júrgizýshi medıtsınalyq tekserýden ótpese nemese kólik basqarýǵa qarsy medıtsınalyq kórsetilim anyqtalsa, onyń kólik quralyn basqarý quqyǵy toqtatylady.
Spıkerdiń aıtýynsha, engizilip jatqan ózgeristerdiń negizgi maqsaty – aıyppul sanyn kóbeıtý emes, jol-kólik oqıǵalarynyń aldyn alyp, jol qozǵalysynyń qaýipsizdigin kúsheıtý.
Aıta keteıik, Astanada jol erejesin buzǵan 19 myńnan astam jaıaý júrginshi jaýapqa tartyldy.
