«Jol júrisi týraly» zańǵa qandaı ózgerister engizildi
ASTANA. QazAqparat - 2017 jyldyń 3 shildesinde Memleket basshysy jol júrisi salasyndaǵy zańnamany odan ári jetildirýge baǵyttalǵan «Qazaqstan Respýblıkasynyń keıbir zańnamalyq aktilerine jol júrisi máseleleri boıynsha ózgerister men tolyqtyrýlar engizý týraly» Zańǵa qol qoıdy. Aıta ketý kerek, atalǵan Zańnyń erejeleri 2017 jyldyń 15 shildesinen bastap qoldanysqa engizildi.
Qazaqstan Respýblıkasynyń Ákimshilik quqyq buzýshylyq týraly kodeksine: kólik quralyn alkogoldik masań kúıde basqarǵany úshin múgedekterdi kólik quraldaryn basqarý quqyǵynan 3 jylǵa aıyrý túrindegi ákimshilik jaýapkershilik engizildi; qarsy jolaqqa shyǵý tyıym salynǵan jerlerde qarsy júrý jolaǵyna shyǵa otyryp, burylý nemese keri burylý úshin kólik quraldaryn basqarý quqyǵynan aıyrý túrindegi ákimshilik jaýapkershilikke tartý týraly naqtylanǵan; jol belgilerimen nemese joldyń júrý bóligindegi tańbalarmen kórsetilgen talaptardy saqtamaǵany úshin aıyppul mólsheri 5-ten bastap 3-ke deıin AEK qysqartyldy; masań kúıin kýálandyrýdan ótýden bas tartqan úshin júrgizýshi kýáliginen aıyrý merzimi 2 jyldan 3 jylǵa deıin kóbeıtildi; ishki ister organdarynyń, áskerı polıtsııanyń qyzmetkeri toqtatqan jaǵdaıda onyń ruqsatynsyz jolaýshy kólik quralyn tastap ketken úshin jaýapkershilik alynyp tastalyndy.
Sondaı-aq, «Jol júrisi týraly» Zańda túngi ýaqytta, ıaǵnı saǵat 23-ten tańǵy 06 saǵatqa deıin qalaaralyq, aýdanaralyq qatynastarda avtobýstarmen turaqty emes tasymaldaýlar arqyly jolaýshylardy tasymaldaýǵa tyıym salý alynyp tastalyndy.
Sonymen birge, eger júrgizýshi kýáliginiń merzimi ótip ketken jaǵdaı oryn alsa, ony qaıta aıyrbastaý kezinde jol júrisi qaǵıdalaryn bilýin tekserý úshin emtıhan tapsyrý jónindegi mindettilik ákimshilik kedergilerdi tómendetý maqsatynda alynyp tastalyndy.
Keıbir baptar boıynsha jol erejeleriniń burynǵy nusqasymen salystyrǵanda bul jolǵy tolyqtyrýlar men ózgerister zań talaptaryn qatańdatý jaǵyna qaraı oıysty. Jaıaý júrginshiler ótkelinen velosıpedti aıdap júrýge tyıym salyndy. Buǵan elimizde bolǵan birneshe jol kólik apattary negiz boldy deýge sebep bar.
Aıta keteıik, Zańǵa engizilgen jańa ózgerister men tolyqtyrýlar boıynsha, endi júrgizýshini jol-patrýldik polıtsııa qyzmetkeri toqtatqanda, ol quqyqtyq naqtylaý maqsatynda óziniń kólikti toqtatý sebebin naqtylaı túsý kerek degen talap engizildi. ıAǵnı, Zańnyń 52-babynyń eskertýinde kólik quralyn toqtatý negizdemeleriniń biri bolyp tabylatyn «arnaıy is-sharalar» uǵymynyń mazmuny ashylyp engizildi. Budan keıin «arnaıy is-sharalar» uǵymy quqyq qorǵaý jáne arnaýly memlekettik organdar júrgizetin jedel-profılaktıkalyq, jedel-izdestirý, kúzet is-sharalary jáne terrorızmge qarsy operatsııalar bolyp naqtylanýy tıis.
Sondaı-aq, kólik quralyna aerografııa salý boıynsha tyıym salý alynyp tastalyndy.
«Tm» sanatyndaǵy (tramvaı) kólik quraldaryn basqarý quqyǵyn alý úshin jasy tómendetildi (25 jastan 21 jasqa deıin) jáne basqa kólik quralyn basqarý tájirıbesi bar bolý qajettigi týraly talap alynyp tastalyndy.
2018 jyldyń 1 qańtarynan bastap qoldanysqa engiziletin berilgeni úshin memlekettik bajdyń joǵarylatylǵan mólsherlerin kózdeıtin memlekettik tirkeý nómirlik belgileriniń tizbesin keńeıtýge qatysty Salyq kodeksine túzetýlerdi qospaǵanda, Zańnyń erejeleri 2017 jyldyń 15 shildesinen bastap qoldanysqa engiziledi.
