Jol júrisi qaǵıdalaryn buzǵany úshin baldyq baǵalaý júıesi engizile me – Turǵymbaevtyń jaýaby
NUR-SULTAN. QazAqparat – Qazaqstanda jol júrisi qaǵıdalaryn buzǵany úshin baldyq baǵalaý júıesi engizýge áli erte. Bul jaıynda Senat depýtattarynyń resmı saýalyna Іshki ister mınıstri Erlan Turǵymbaevtyń jaýabynda aıtylǵan, dep habarlaıdy QazAqparat tilshisi.
«Qazirgi ýaqytta QR Ákimshilik quqyq buzýshylyq týraly kodeksinde jol júrisi salasyndaǵy quqyq buzýshylyqtardyń 89 quramy, olardy buzǵany úshin aıyppul túrinde jazalaý kózdelgen. Munan bólek jol júrisi qaǵıdalarynyń birqatar talaby bar. Olardy buzǵany úshin kólik quraldaryn basqarý quqyǵynan aıyrý ne ákimshilik qamaýǵa alý túrindegi ákimshilik jaza, sondaı-aq bir jyl ishinde qaıtadan quqyq buzýshylyq jasaǵan kezde qatań jaza qoldanylýy múmkin. Sonymen qatar, jol júrisi qaǵıdalaryn qaıta buzǵan kólik quraldary júrgizýshilerine ákimshilik-quqyqtyq yqpal etý sharalary qarastyrylǵan. Atap aıtqanda, olar jol júrisi qaǵıdalaryn bilýge tekserýge jiberiledi», - dep atap ótedi mınıstr.
Erlan Turǵymbaevtyń aıtýynsha, júrgizýshi 2 aı ishinde jol júrisi qaǵıdalaryn biletindigin dáleldep emtıhan tapsyrmasa, onda onyń júrgizýshi kýáliginiń qoldanylýyn toqtatý sharasy qabyldanady.
«Baldyq júıeni engizgen jaǵdaıda júrgizýshi kýáliginen aıyrýǵa ákep soqpaıtyn jol júrisi qaǵıdalaryn árbir buzýshylyqty teris qylyqtyń aýyrlyǵyna baılanysty balmen baǵalaý qajet. ıAǵnı, júrgizýshi kýáliginiń qoldanylý merzimin toqtatýǵa ákep soǵatyn aıyppul balynyń shekti sanyn belgileý kerek. Aıtylǵandardy eskere otyryp, Qazaqstanda jol júrisi qaǵıdalaryn buzǵany úshin aıyppul balyn esepteý júıesin engizý qazirgi ýaqytta erte jáne ǵylymı-zertteý ınstıtýtyn tarta otyryp qosymsha zerdeleýdi talap etedi dep esepteımiz. Sebebi, apattylyq jaǵdaıyna yqpal etýge baılanysty jol júrisi qaǵıdalary talaptaryn árbir buzýshylyqqa ball mólsheriniń ádisnamasyn jáne negizdemesin ázirleý qajet bolady», - dedi Erlan Turǵymbaev.
