Jol jóndeýde kedergi keltiretin qandaı faktorlar bar - QazAvtoJol málimeti
«Jol-qurylys maýsymy aıasynda respýblıkalyq avtojoldar jelisin qaıta jańartý jáne jóndeý boıynsha belsendi jumys júrgizilýde. Máselen, respýblıkalyq mańyzy bar «Ónege-Bısen-Saıqyn», «Qaztalov-Jánibek-RF shekarasy», «Atyraý-Astrahan», «Aqtóbe-Qandyaǵash», «Qalbataý-Maıqapshaǵaı», «Taldyqorǵan-Qalbataý-Mapqapshaǵaı» jáne taǵy basqa avtojoldarda jumystar qaıta jandanyp, qarqyndy júrip jatyr. Qurylysty qaıta jandandyrý úshin aýqymdy jumys atqaryldy: qurylys konsortsıýmdarynyń quramy qaıta qaraldy, qurylysqa jumyldyrylǵan arnaıy tehnıka men jolshy mamandardyń sany edáýir artty, qosalqy merdiger uıymdar jumyldyryldy», -dep habarlady baspasóz qyzmeti.
Máselen, «Atyraý-RF shekarasy (Astrahan)» avtojolyn rekonstrýktsııalaý, «Qaztalov –Jánibek-RF shekarasy» jáne «Ónege-Bısen-Saıqyn» avtojoldaryn kúrdeli jóndeý jobalaryn iske asyrý aıasynda merdiger uıymdar 10 asfalt-beton zaýytyn, 7 topyraq aralastyrǵysh qurylǵy men jol-qurylys materıaldaryn qabyldaý úshin 10 temirjol tuıyǵyn jasaqtaǵan. Sondaı-aq, 950 arnaıy tehnıka men 1300 jolshy maman tartylǵan.
Alaıda, jol qurylysyna keri áserin tıgizip otyrǵan birneshe faktor bar.
«Birinshiden, bıtým tapshylyǵy oryn alýda. Іshki naryqty bıtýmmen qamtamasyz etý boıynsha birneshe ret quzyretti, beıindi memlekettik organdarmen keńes ótkizildi. Respýblıkalyq jeli boıynsha avtojol jobalarynyń qajettiligi úshin bıtýmdy irikteýge járdemdesý basymdyǵy atap ótilgen bolatyn. Alaıda, búgingi kúni jol kompanııalarynyń ótinimderin rastaýda qıyndyqtar bar. Mysaly, bıyl joǵaryda atalǵan obektiler boıynsha bıtým qajettiligi 59 myń tonnany qurady. Al, is júzinde 13 myń tonna bıtýmmen qamtamasyz etildi.
Ekinshiden, qıyrshyq tasty tasymaldaýǵa arnalǵan vagondardyń sany tapshy. Batys Qazaqstan oblysynda karerler joq. Sáıkesinshe, qıyrshyq tasty kórshi óńirlerden tasymaldaý qajet. «Qazaqstan temir joly» UK» AQ jáne «QazTemirTrans» AQ-men birlesken talqylaý, keńes kezinde temirjol arqyly jol-qurylys materıaldaryn tasymaldaý úshin vagondar sanyn arttyrý máselesi kóterildi. Alaıda, tıisti nátıje áli baıqalmady. Qazir batys óńirlerdegi vagon sany 2700 birlikti qurasa, onyń 1000-y kómir tasymaldaýǵa jumyldyrylyp otyr.
Úshinshiden, dızel otynynyń tapshylyǵy, bar bolǵannyń ózinde quny artyp otyr. Qurylys jumystaryna qajet jol-qurylys tehnıkasy barynsha jumyldyryldy. Tehnıkalardy táýligine shamamen 100-130 tonna dızel otynymen qamtamasyz etý qajet», -dep málim etti kompanııanyń ıýaspasóz qyzmeti.
«QazAvtoJol» UK» AQ Memleket basshysynyń tapsyrmasyn oryndaý úshin barlyq sharany qabyldaýda. Alaıda, joǵaryda atalǵan sebepterge baılanysty tapsyrmanyń ýaqtyly oryndalmaý qaýpi bar.
Eske sala ketelik, buǵan deıin Atyraýdan Reseıge qatynaıtyn jol qurylysy baıaý júrip jatqanyn jazǵan bolatynbyz.