Jol jóndeý jumystaryna baılanysty Astananyń keıbir kóshelerinde qozǵalystar shekteldi
ASTANA. Tamyzdyń 4-i. QazAqparat - Búgin Astanada káriz qudyqtary qaqpaqtaryn kóterý jumystaryna baılanysty Pýshkın kóshesinen bastap Abaı dańǵylynyń boıymen Ýálıhanov kóshesine deıingi kólik joldary jabyldy.
Bul týraly Astana qalalyq Jol polıtsııasy basqarmasynyń baspasóz qyzmetinen málim etti.
Sonymen birge, jylý júıeleriniń tartylýyna baılanysty Potanın men Á.Moldaǵulova kósheleri tolyǵymen jabyldy.
Beıbitshilik kóshesi men Jeńis dańǵyly aralyǵyndaǵy Seıfýllın kóshesinde jol-jóndeý jumystary jalǵasyp jatqandyqtan bul baǵyttaǵy qozǵalystar áli de shekteýli.
Sondaı-aq sý qubyrlarynyń tóselýine baılanysty Abylaıhan dańǵyly men Pýshkın kósheleriniń qıylysynda da kólikterdiń emin-erkin júrýine shekteý qoıyldy.
Astana qalasynyń Jol polıtsııasy basqarmasy, avtokólik ıelerine atalǵan aýdandardy aınalyp ótý joldaryn aldyn ala josparlaýǵa keńes beredi.
