Jol jóndegende alynǵan belgiler nege ornyna qaıta qoıylmaıdy
ÓSKEMEN. KAZINFORM – Óskemen qalasynyń júrgizýshileri jol jóndeý jumystary kezinde alynyp tastalǵan jol belgileri qaıta qoıylmaıtynyna, al kerisinshe ýaqytsha belgiler sol kúıi alynbaıtyndyǵyna shaǵymdandy.
Júrgizýshiler ábigerge tústi
Jyl saıyn qala kóshelerinde jóndeý jumystary júrgizilip jatady. Sol kezde jol shetterine jyldamdyqty shekteıtin belgiler qoıylady.
— Jol jóndelip bitkennen keıin belgiler alynbaı qalatynyna talaı márte kýá bolyp júrmin. Bul másele qaladan shyǵar tasjoldarǵa da qatysty. Máselen, Samar tasjolyndaǵy Laıly shatqaly mańynda jol ortasha jóndeýden ótken bolatyn. Alaıda tıisti jumystar aıaqtalsa da jyldamdyqty shekteıtin belgi 2 aıdan astam ýaqyt boıy alynbaı turdy. Mundaı jaǵdaı ózge de ýchaskelerde jıi kezdesedi. Ne sebepti jol jóndeý jumystary áldeqashan máresine jetse de, ýaqytsha belgiler qalyp qoıady?! Buǵan kim jaýapty? — deıdi Samat esimdi kólik júrgizýshisi.
Al keı júrgizýshiler mundaı belgilerdi múlde elemeıtindikterin aıtty. Sebebi olardyń pikirinshe, belgiler ózektiligin joǵatqan. Sondyqtan ýaqytsha belgide kórsetilgen jyldamdyqty saqtamaı jatady.
Taǵy bir másele — jol jóndeý jumystary kezinde alynyp tastalǵan jol belgileriniń qaıta qoıylmaıtyndyǵy.
— Jibek matalar kombınaty yqshamaýdanyndaǵy Sátbaev dańǵylynda 1-shi baǵdarshamnan ońǵa burylǵanda ataýy joq kóshe shyǵady. Bul kósheniń boıymen júre otyryp Jastar kóshesine burylýǵa nemese Esenberlın dańǵylyna ótýge bolady. Osy qıylysta buryn, ataýy joq kósheniń boıynda «Jol berińiz» belgisi bar bolǵan. Keıinnen jol jóndeý jumystary júrgizilgen soń, belgi alynyp tastaldy da qaıta qoıylmady. Keı júrgizýshiler burynǵy ádetine salyp, alynyp tastalǵan jol belgisine baǵynyp, Jastar kóshesinen shyqqan kólikke jol berip jatady. Degenmen eger jolda belgi ornatylmasa, júrgizýshiler oń jaqtaǵy kólikke jol berýi tıis. Keı júrgizýshiler qarapaıym erejeni eskermegendikten jol-kólik oqıǵasy da bolady. Ásirese, turǵyndar jumysqa barar ne qaıtar ýaqytta dál osy qıylysta keptelis bolyp, júrgizýshiler ábden ábigerge túsedi. Sol jerge «Jol berińiz» belgisi ornatylǵanyn tosyp júrgenimizge aı emes jyl boldy, — deıdi Erkebulan Muhamedov.
Polıtsııa ne deıdi?
Júrgizýshiler kótergen máselelerge qatysty ShQO polıtsııa departamentine habarlastyq.
Departamenttiń ákimshilik polıtsııa basqarmasynyń ókili Denıs Galıev alynbaı qalatyn ýaqytsha jol belgileri týraly saýalǵa jaýap berdi.
— Júrgizýshiler asfalt tóselip bitken soń ýaqytsha jol belgileri alynbaǵanyn aıtyp, shaǵymdanyp jatady. Biraq bul belgilerdi alýdy umytyp ketti degen sóz emes. Kóbine joldaǵy jumys áli tolyq aıaqtalmaǵan. Atap aıtqanda, jolaq syzý, qosymsha belgiler qoıý degen sekildi. Sondyqtan keı jaǵdaıda mundaı shekteýlerdiń turýy oryndy, — deıdi Denıs Galıev.
Onyń aıtýynsha, jol belgileriniń talapqa sáıkes ornatylýyn qamtamasyz etý jáne baqylaý — polıtsııa quziretinde. Al belgi ornatý jáne olardy ýaqytynda alyp tastaý — jol jóndeý jumysyn júrgizetin merdiger uıymnyń jaýapkershiliginde.
— Biz ýaqytsha qoıylǵan jol belgileriniń birden alynyp otyrylýyn baqylaýǵa tyrysamyz. Biraq keıde bárin birdeı qamtý múmkin bolmaı jatady, — deıdi polıtsııa ókili.
Jibek matalar kombınaty yqshamaýdanyndaǵy alynyp tastalyp, qaıta qoıylmaǵan jol belgisine qatysty suraqty Kazinform tilshisi Óskemen qalasy polıtsııa basqarmasy bastyǵynyń orynbasary, polıtsııa maıory Erkin Sattybaevqa qoıyp kórdi.
— Iá, sol jerde buryn «Jol berińiz» belgisi turǵan. Eger turǵyndar qajet dese onda qarastyraıyq. Tańerteńgi jáne keshki kepteliste naqty qansha kólik ótetinin esepteıik. Sosyn bir sheshim shyǵaramyz, — deıdi ol.
Eske salsaq, osyǵan deıin Almaty oblysy ákiminiń orynbasary jol apatyna ushyraǵany habarlanǵan.