Jol joq, kópir qurylysy bastalar emes: BQO turǵyny alys aýyl máselesin kóterdi
ORAL. KAZINFORM — Batys Qazaqstan oblysy Aqjaıyq aýdany Quraılysaı aýyldyq okrýgine qarasty Saıqudyq eldi mekeniniń birneshe máselesi sheshilmeı tur.
Aýyl turǵyny Tájiqyz Dúısenǵalıevanyń málim etkenindeı, Saıqudyq aýdan ortalyǵynan shalǵaıda 100 shaqyrym shamasynda ornalasqan.
Onyń sózine qaraǵanda, aýyl adamdaryn eń aldymen qınaıtyny – jol. Jol salynady delingeli biraz jyldyń júzi bolsa da, «baıaǵy jartas – sol jartas», qurǵaq ýádelerden eshteńe óner emes.
- Óleńti ózeninen ótetin kópir salý máselesi de kópten aıtylyp keledi. Biraq munyń da sheshiletin túri joq. Buǵan qomaqty qarajat kerek degendi aıtady. Betin topyraqpen jaýyp, jasalǵan ótkel ǵoı. Qazirgi kezde jańbyr jaýyp tur, ezilip jatyr. Jaýyn-shashyn jalǵassa, ótkelden ótý qıynǵa aınalatyn túri bar, - deıdi T.Dúısenǵalıeva.
Turǵynnyń aıtýynsha, bıyl aýylda zamanaýı úlgidegi turǵyn úıler boı kótergen. Alaıda merdiger «Art Stroı» JShS M.Ótemisuly kóshesinen taǵy bir eki páterlik úıdiń ornyn belgilep qoıǵanymen, qurylysy aıaqsyz qalǵan.
- Aınalasynda septık úshin qazylǵan shuńqyrlary ashyq kúıinde tur. Alda qar túsken kezde adamǵa da, janýarlarǵa da qaýipti ekendigin oılamaǵany ma? Sol jerlermen júrip, balalar mektepke baryp keledi. Olardyń jaıy ne bolmaq? Taǵy bir másele, Jamannan keletin aýyz sýdyń azaby jeterlik. Sý qubyrlary joǵary qysymǵa shydamaı, jarylyp qalady. Ony aýystyrý, qubyrdyń búlingen jerlerin jamaý, sol jerdiń uńǵymasyn qazý úshin traktor ákelýdiń ózi uzaq áńgime. Bul týraly osyǵan deıin de jazyldy, - deıdi Saıqudyq aýylynyń turǵyny.
Osy máselege oraı Kazinform tilshisi Aqjaıyq aýdany ákimdigine arnaıy saýal joldady.
Ákimdik málimetine qaraǵanda, Barbastaý-Aqjaıyq-Inder avtojolynyń 93-145 shaqyrymyna jóndeý jumystary júrgizilip jatqany belgili. Soǵan baılanysty atalǵan jol boıynda ornalasqan eldi mekenderge, sonyń ishinde Juban aýylynyń kireberis jolyn jóndeý úshin jobalyq-smetalyq qujattama jasalyp, saraptamadan ótkizilgen. Birinshi kezeń – 17 shaqyrym, joba quny – 2 mlrd 879,9 myń teńge, ekinshi kezeń – 17 shaqyrym, 2 mlrd 635,6 mln teńge. Tıisti oblystyq basqarmalarǵa bıýdjettik ótinim joldanǵan. Osy 34 shaqyrym jasalǵannan keıin ǵana Saıqudyq eldi mekenine deıingi jolǵa joba jasalatyn bolady.
- Kópir boıynsha kóterilgen máselege keletin bolsaq, atalǵan jol aýdandyq mańyzy bar joldardyń qatarynda tirkelmegen. Degenmen jergilikti ákimdik pen aýyl turǵyndary birlesip, jol qatynasyn úzbeý maqsatynda bıyl aǵyn sý buzǵan ýchaskelerge múmkinshiligine qaraı topyraq tóselip, qalpyna keltirildi. Jalpy, kópir qurylysy – kúrdeli jáne qomaqty qarajatty talap etetin máselelerdiń biri. Jańadan kópir salý máselesi kúni búginge sheshimin tappaı otyr. Turǵyn úı qurylysy boıynsha «Art Stroı» JShS-men habarlasqan kezde atalǵan jer telimi olardyń menshiginde bolmaı shyqty. Soǵan qaramastan, bul jumystar sol mekemeniń aralasýymen júrgizilgendikten, eskertý berildi. Merdiger jer qatqanǵa deıin atalǵan jerdi kómip, qalpyna keltiretin bolady, - delingen resmı jaýapta.
Eske sala keteıik, budan buryn BQO-da aýyl turǵyndarynyń bir apta boıy sý joqtyǵyn aıtyp shaǵymdanǵanyn jazǵan edik.