Jol jamylǵylaryn jobalaýda Superpave tehnologııasy engiziledi — Kólik mınıstrligi

ASTANA. KAZINFORM — El tarıhynda alǵash ret jol salýǵa qajetti 79 jańa materıalǵa dalalyq synaq júrgiziledi. Bul týraly Kólik mınıstrligi Avtomobıl joldary komıteti tóraǵasynyń orynbasary Anar Ǵabdýllına aıtty.

— Qazirgi zamanǵy tsıfrlyq jáne tehnologııalyq sheshimder ázirlenip, tájirıbege engizilip jatyr. Atalǵan jumystar 2025 jyly da jalǵasyn tabady. Atap aıtqanda, jol qozǵalysyn toqtatpaı-aq kópir qurylymdaryn ekspress-dıagnostıkalaýǵa múmkindik beretin mobıldi júıelerdiń iske qosylýy bastaldy. Budan bólek, el tarıhynda tuńǵysh ret 79 jańa materıaldyń dalalyq synaǵy júrgiziledi. Bul eń tıimdi sheshimderdi iriktep, engizýge múmkindik beredi. Superpave tehnologııasy boıynsha jol jamylǵylaryn jobalaýdyń halyqaralyq standarttary engizilmekshi, — dedi Anar Ǵabdýllına Ortalyq kommýnıkatsııalar qyzmetindegi brıfıngte.

Komıtet ókiliniń aıtýynsha, sońǵy jyldary otandyq ǵalymdar men ınjenerlerdiń bastamasymen birqatar mańyzdy jobalar júzege asyryldy.

— Atap aıtqanda, jańa býynǵa arnalǵan kóktaıǵaqqa qarsy reagent, jol belgileýge arnalǵan organo-eritindilik boıaý, polımer-bıtýmdy baılaǵysh daıyndaýǵa arnalǵan qurylǵy sııaqty biregeı ázirlemeler jasaldy, — dedi ol.

Aıta keteıik, Úkimette Premer-Mınıstrdiń orynbasary — Ulttyq ekonomıka mınıstri Serik Jumanǵarınniń tóraǵalyǵymen ótken ekonomıkalyq ósýdi qamtamasyz etý jónindegi shtab otyrysynda avtomobıl jáne temirjoldardy damytý jónindegi ınvestıtsııalyq jobalar qaraldy.

Qazirgi ýaqytta Jol qaýipsizdigi jónindegi alǵashqy ulttyq strategııany ázirleý jumysy bastaldy.