Jol tazalyǵyna salǵyrt qaraǵan jumysshylar jumystan shyǵaryldy

ASTANA. KAZINFORM – Qadaǵalaý is-sharalary jol qyzmetteriniń jumysy joldardy meteorologııalyq faktorlardyń áserinen tıisti qorǵaýdy qamtamasyz etpeıtinin kórsetti, dep jazdy Kólik prokýratýrasy.

Máselen, Soltústik Qazaqstan kólik prokýratýrasy «QazAvtoJol» UK» AQ jáne «Qajservıs» JShS aýmaqtyq fılıaldarynda qar tazalaý tehnıkasy men kóktaıǵaqqa qarsy materıaldardyń tapshylyǵyn anyqtady.

«Temperatýranyń kúrt ózgerýi men qardyń túsýi kezindegi bul jaǵdaı Soltústik Qazaqstan oblysynyń respýblıkalyq joldaryndaǵy jol qozǵalysyn qıyndatyp, onyń qatysýshylarynyń qaýipsizdigine tikeleı qaýip tóndirdi.

Shymkent kólik prokýratýrasy osyǵan uqsas zańdylyqtyń jaı-kúıine júrgizgen taldaý nátıjeleri de Túrkistan oblysynyń respýblıkalyq joldaryn kútip ustaý úshin jol tehnıkasynyń qajetti sanynyń joqtyǵyn aıǵaqtaıdy», — delingen habarlamada.

Nátıjesinde, ótken jyldyń 12-15 jeltoqsany aralyǵynda qarly boran men qar jaýǵan kezde keshiktirilgen tazalaý jumystary Shymkent-Taraz baǵyty boıynsha kólik aǵynyn toqtatqan (50-ge jýyq avtokólik quraldary joldarda «turyp qaldy»).

Anyqtalǵan buzýshylyqtardy joıý úshin prokýratýralarmen avtomobıl joldaryn basqarý jónindegi ulttyq operatordyń atyna usynýlar engizildi.

Prokýratýranyń qadaǵalaý aktileriniń biri boıynsha laýazymdyq mindetterin tıisinshe oryndamaǵany úshin 11 qyzmetkermen jáne «Qajservıs» JShS Soltústik Qazaqstan oblystyq fılıalynyń dırektorymen eńbek sharttary buzyldy.

«Qyzmet kórsetetin merdigerlerge 1,6 mln teńgeden astam somaǵa aıyppul salyndy.

Sonymen qatar, kólik prokýrorlarynyń aralasýynan keıin «QazAvtoJol» UK» AQ aldaǵy ýaqytta el óńirlerine taratý úshin 245 birlik qosymsha jol tehnıkasyn satyp alýǵa baǵyttalǵan is-sharalar júrgizýde», — dep jazdy baqylaýshy organnan.