Jol taýqymetin tartqan óskemendik múgedekke ákimi qol ushyn berdi

ASTANA. QazAqparat - Óskemen qalasynyń ákimi Qýat Tumabaev І toptyń múgedegi Dáýren Alqanovtyń ótinishin oryndap, úıine deıin aparatyn jolǵa asfalt tósep berýge ýáde etti, habarlaıdy «QazAqparat» HAA tilshisi.

Bul týraly Dáýren Alqanov Feısbýktegi paraqshasynda habarlady. Onyń aıtýynsha, ózi turatyn Bogdan Hmelnıtskıı kóshesi múgedekter arbasy túgili, avtokóliktiń ótýine qıyndyq keltirgen. Osy sebepti, buralań joldarmen júrýden qınalǵan Dáýren arbasyn eki ret aýystyrýǵa májbúr bolypty. Dáýrenniń ótinishinen keıin qala ákimi arnaıy baryp, atalǵan kósheni jóndep berýge ýáde bergen.

«Ákim meniń máselemnen shet qalmaı, ózi kirip shyqty. Ol bizdiń kósheniń joly jóndeletinine, asfalt tóseletinine ýáde berdi. Bılik ókilderine jetýdiń ózi keıde qıyndyq týǵyzyp jatqanda, qalanyń ákimi kelip máselemizge mán berip jatqany qýantady», - deıdi Dáýren Alqanov.

Óskemen qalasy ákiminiń baspasóz qyzmeti, Dáýren Alqanov osydan eki apta buryn qala ákiminiń qabyldaýynda bolyp, joldy jóndeý týraly ótinish bildirgenin, máseleniń mánisin túsingen qala basshysy birden joldy jóndeýge tapsyrma bergendigin aıtty.