Jol sapasynyń nashar bolǵany úshin jaýaptylardyń bárin jazaǵa tartý kerek - Prezıdent

NUR-SULTAN. QazAqparat – Avtojol salasyn keshendi túrde qaıta jańǵyrtý kerek. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

Qazaqstan Prezıdenti avtojol salasyn keshendi túrde qaıta jańǵyrtý kerektigin basa aıtty

«FIDIC halyqaralyq qaǵıdattaryn engizgen jón. Ony júzden astam el paıdalanyp otyr. Bul júıe jol salasyn tıimdi basqarýǵa, bıýdjet qarajatyn utymdy paıdalanyp, barlyq deńgeıdegi jemqorlyq qaýpin azaıtýǵa múmkindik bermek. Mundaı júıege kóbi qarsy bolady. Bul jerde mınıstrdiń jáne tıisti vıtse-premerdiń nyq ustanymy qajet. Tutastaı alǵanda, osy másele boıynsha arnaıy komıssııa qurý kerek. Oǵan Úkimet múshelerin, Prezıdent Ákimshiligi, quqyq qorǵaý organdarynyń ókilderin, depýtattardy qosqan jón. Jarty jyl ishinde barlyq kemshilikti, sonyń ishinde jemqorlyqty jáne olqylyqtardy túzetýge baǵyttalǵan usynystardy ázirlep, maǵan baıandaý qajet», - dedi Qasym-Jomart Toqaev.

Memleket basshysy atalǵan komıssııa keminde sońǵy 10 jyldyń ishinde jol salý salasynda jiberilgen zań buzýshylyqtardy tyńǵylyqty zerdeleýi qajettigin basa aıtty.

«Elimizdegi joldardyń sapasynyń jaman bolǵany úshin barlyq jaýapty tulǵalar zańǵa sáıkes jazaǵa tartylýy tıis», - dedi Prezıdent.