Jol sapasyna jaýapty 400-den astam laýazymdy tulǵa jaýapkershilikke tartyldy – mınıstrlik

NUR-SULTAN. QazAqparat – Іshki ister mınıstrligi joldardyń sapasyn kútip ustamaǵan 400-den astam laýazymdy tulǵany jaýapkershilikke tartty. Brıfıng aıasynda BAQ ókilderiniń saýalyna jaýap bergen Ákimshilik polıtsııa komıteti tóraǵasynyń orynbasary Jandos Muratálıev osylaı dep málimdedi, dep habarlaıdy QazAqparat tilshisi.

Jandos Muratálıev aldaǵy ýaqytta jol-kólik oqıǵasy sapasyz jol saldarynan bolǵany anyqtalsa, onda joldy kútip-baptaýmen aınalysatyn kompanııa ókilderin jaýapkershilikke tartý kózdelip otyrǵanyn jetkizdi.

«Qaýipsiz jol» aılyǵynyń alǵashqy aptasynda biz 400-den astam laýazymdy tulǵany jaýapkershilikke tarttyq. Olar jol sapasyn qadaǵalaýda, belgilerdi ornatýda jáne jol boıynda ózge de jóndeý jumystaryn júrgizýde olqylyqtarǵa oryn bergen. Osy baǵytta óz mindetin durys atqarmaǵan laýazymdy tulǵalarǵa qatysty, tipti qylmystyq is qozǵalǵany týraly faktiler de bar. Olardyń isi sotqa deıin jetken», - dedi Jandos Muratálıev.

Spıker bul máseleni mınıstrlik baqylaýǵa alatynyn málimdedi.

Sonymen qatar, Jandos Muratálıev jol erejesin jıi buzatyndar úshin 50% jeńildikti alyp tastaý týraly ózgerister qaı ýaqytta engiziletinin aıtty.

Aıta ketsek, keshe jol sapasyna narazy Almaty oblysynyń turǵyndary trassany jaýyp tastaǵanyn jazǵan edik.