Jol sapasyn baqylaý úshin JI engizý qajet – Premer-mınıstr tsıfrlyq platforma ázirleýdi tapsyrdy

ASTANA. KAZINFORM – Premer-mınıstr Oljas Bektenov jyl sońyna deıin respýblıkalyq, jergilikti jáne qalalyq joldardyń jaǵdaıyn, jumystardyń barysy men bıýdjet qarajatynyń tıimdiligin baqylaıtyn biryńǵaı tsıfrlyq platforma ázirleýdi tapsyrdy.

Úkimet basshysy barlyq avtojoldardyń normatıvtik jaǵdaıyn saqtaý – basym mindetterdiń biri ekenin atap ótti.

– Jol aktıvteriniń sapasyn baqylaý úshin jasandy ıntellektini belsendi túrde engizý qajet. Bul salany tsıfrlyq transformatsııalaý isi josparlaý men jobalaýdan bastap, paıdalaný jáne tehnıkalyq qyzmet kórsetýge deıingi barlyq kezeńde basqarýdyń tıimdi quralyna aınalýǵa tıis. Kólik jáne Jasandy ıntellekt mınıstrlikterine, «QazAvtoJol» kompanııasy men Sapa ortalyǵyna osy jyldyń sońyna deıin respýblıkalyq, jergilikti jáne qalalyq jeliler boıynsha derekterdi ıntegratsııalap, joldardyń jaǵdaıyn, jumystardyń barysy men bıýdjet qarajatynyń tıimdiligin baqylaýdyń biryńǵaı tsıfrlyq platformasy jumysyn qamtamasyz etýdi tapsyramyn, – dedi O. Bektenov Úkimettiń búgingi otyrysynda.

Premerdiń aıtýynsha, bul obektıvti jaǵdaıdy naqty ýaqyt rejıminde baqylaýǵa jáne aqaýlardy der kezinde joıýǵa múmkindik beredi.

Buǵan deıin O. Bektenov joldardyń múshkil jaǵdaıyna qatysty azamattar shaǵymy azaımaı turǵanyn aıtqan edi.

Sondaı-aq, elimizde aqyly joldar qataryna taǵy 6 ýchaske qosylady. Aqyly jolda aqaý anyqtalsa, tólem ýaqytsha toqtatylady.