Jol sapasyn baqylaý: elimizde asfaltbeton zaýyttaryn attestattaý bastaldy
ASTANA. KAZINFORM - Jol aktıvteri sapasynyń ulttyq ortalyǵy (JASUO) RMK jol-qurylys maýsymyna daıyndyq barysynda respýblıka aýmaǵyndaǵy asfaltbeton zaýyttarynyń (ABZ) jyl saıynǵy ınspektsııasyna kiristi, dep habarlaıdy QR Kólik mınıstrliginiń baspasóz qyzmeti.
Tekserýlerdiń maqsaty - materıaldardyń sapasynyń joǵary bolýyn qamtamasyz etý, óndirýshilerdiń jaýapkershiligin arttyrý jáne eldegi jol jamylǵysynyń beriktigin arttyrý.
Qazir Qazaqstanda tirkelgen 440 zaýyttyń 52-si (12%) tekserildi. Negizinen kún jyly óńirler: Aqtóbe oblysynda 28 zaýyt, Almaty oblysynda 18 zaýyt, Atyraý oblysynda - 3, Túrkistan oblysynda-2 jáne Almaty qalasynda 1 zaýyt.
Inspektsııa barysynda mamandar zaýyttar men zerthanalardyń jaraqtandyrylýy, sapany baqylaý qyzmetiniń bolýy, sondaı-aq kireberisti baqylaý, materıaldardy saqtaý jáne tasymaldaý erejeleriniń saqtalýy sııaqty talaptar boıynsha baǵalaý jasady. Tekserý shıkizatty tańdaýdan bastap daıyn qospany shyǵarýǵa deıingi búkil óndiris tsıklin qamtıtyn 16 negizgi talap negizinde júrgiziledi.
Attestattaý nátıjeleri boıynsha barlyq derekter rcmbase.kz. jol materıaldarynyń biryńǵaı aqparattyq júıesine engiziledi. Avtomobıl joldary men áýeaılaqtardy salý jáne jóndeý kezinde júıelik monıtorıng sapasyz ónimdi paıdalanýǵa jol bermeıdi. Tıisinshe tehnologııalyq aýytqýlardy ýaqtyly anyqtaýǵa jáne olardy jedel joıýǵa múmkindik beredi.
- QR Kólik mınıstrliginiń tapsyrmasy boıynsha 2024 jyldan bastap JASUO ABZ attestattaýdy turaqty ótkizedi, - delingen habarlamada.
Osyǵan deıin Úkimet basshysyna saýal joldaǵan Májilis depýtaty Janarbek Áshimjan jol sapasyna memlekettik baqylaýdy kúsheıtý kerektigin aıtqan bolatyn.
