Jol sapasyn baǵalaýǵa Japonııa tehnologııasy tartylýy múmkin
ASTANA. KAZINFORM — Qazaqstandaǵy avtomobıl joldaryn dıagnostıkalaý kezinde japondyq Mobile Mapping System (MMS) mobıldi kartografııalaý júıesin qoldaný múmkindigi qarastyrylyp jatyr. Bul baǵytta «Jol aktıvteri sapasynyń ulttyq ortalyǵy» Japonııanyń Aero Toyota Corporation kompanııasymen yntymaqtastyq týraly memorandýmǵa qol qoıdy.
Qujat jol ınfraqurylymyn tekserý tásilderin jetildirýdi, dıagnostıkaǵa tsıfrlyq tehnologııalardy tartýdy jáne halyqaralyq tájirıbe almasýdy kózdeıdi.
Memorandým aıasynda japondyq kompanııa Ulttyq ortalyqqa konsýltatsııalyq qoldaý kórsetedi. Atap aıtqanda MMS júıesin ortalyqtyń jumysyna yqtımal engizý joldary zerdelenip, ony qoldaný ádisnamasy men tehnıkalyq talaptary boıynsha usynystar ázirlenedi.
Jumystyń qorytyndysy boıynsha Aero Toyota Corporation júıeni qoldaný ádisnamasy men tehnıkalyq sıpattamalary qamtylǵan tolyq esep negizinde MMS tehnologııasyn Qazaqstandaǵy jol ınfraqurylymyn dıagnostıkalaý kezinde paıdalaný múmkindigi qarastyrylmaq.
Budan bólek taraptar jol-qurylys materıaldarynyń sapasyn arttyrý, avtomobıl joldaryn salý, jóndeý jáne kútip-ustaý tájirıbesin jetildirý baǵytynda da birlesip jumys isteýdi josparlap otyr.
Sondaı-aq joldardy monıtorıngteý, dıagnostıkalaý jáne pasporttaý salasynda tsıfrlyq tehnologııalardy damytý, tájirıbe almasý jáne birlesken jobalardy iske asyrý máseleleri yntymaqtastyqtyń basym baǵyttarynyń biri bolmaq.
Aıta keteıik, buǵan deıin, Toyota men Waymo 2027 jyly Japonııada júrgizýshisiz taksı qyzmetin iske qosatynyn jazǵan edik.
