Jol sapasyn baǵalaý júıesin qaıta qaraý kerek — Prezıdent
ASTANA. KAZINFORM — Qurylys jumysyn basynan aıaǵyna deıin qatań qadaǵalaý qajet. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Memleket aımaqtardy damytýǵa turaqty túrde basa mán beredi. Bul — memlekettiń basty mindetiniń biri. Sońǵy jyldary osy baǵytta aýqymdy jumys atqaryldy. Elimizdiń ár aımaǵynda turǵyn úıler, áleýmettik nysandar, joldar qarqyndy salynyp jatyr. Qazaqstan tutastaı úlken qurylys alańyna aınalyp keledi. Muny bárińiz de kórip-bilip júrsizder. Eń bastysy, barlyq qurylysty sapaly ári ýaqytyly júzege asyrý óte mańyzdy, — dedi Memleket basshysy.
Prezıdent keıde jańadan salynǵan keıbir nysandardyń sapasy syn kótermeıtinin, tipti, qoǵam talqysyna túsip jatatynyn atap ótti.
— Osyndaı salǵyrt jasalǵan jumystyń kesiri qaıǵyly jaǵdaıǵa ákep soqtyrýy da múmkin. Bul turǵydan alǵanda, jol salasyndaǵy ahýal da máz emes. Mysaly, «Taldyqorǵan — Óskemen» kúre jolynyń ashylǵanyna kóp ýaqyt ótpese de, toza bastaǵan. Sondyqtan, jol sapasyn baǵalaý júıesin qaıta qaraý kerek. Qurylys jumysyn basynan aıaǵyna deıin qatań qadaǵalaý qajet. «Jol aktıvteri sapasynyń ulttyq ortalyǵy» mekemesiniń qyzmetin kúsheıtý kerek. Jalpy, osy salaǵa túbegeıli reforma jasaǵan jón. Qoǵamdyq baqylaýdy kúsheıtý qajet, — dedi Qasym-Jomart Toqaev.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
