Jol salýǵa arnalǵan jer telimderiniń qoldanys maqsatyn ózgertýge moratorıı jarııalanady
ASTANA. KAZINFORM – Premer-Mınıstr Oljas Bektenov ákimderge jol salýǵa arnalǵan jer telimderiniń qoldanys maqsatyn ózgertýge moratorıı jarııalaýdy tapsyrdy.
- Aldaǵy ýaqytta jobalardyń qymbattap, merzimderdiń sozylyp ketýine jol bermeý úshin barlyq daıyndyq jumystaryn erte bastap júrgizý kerek. Ákimdikterge bolashaq jobalarǵa arnalǵan jerlerdi rezervke qoıyp, ol telimderdi berýge jáne nysanaly maqsattaryn ózgertýge moratorıı jarııalaýdy tapsyramyn, - dedi ol Úkimet otyrysynda.
Úkimet basshysy tıisti mınıstrlikterge de tapsyrma berdi.
- Ónerkásip mınıstrligi ákimdiktermen birlesip, avtojol jobalaryna tartylǵan karerlerdiń qujattaryn rásimdeý qajet. Kólik mınıstrligi jol salýǵa qajetti jerlerdi memleket muqtajy úshin jedel satyp alýdy zańnama deńgeıin retteý máselesin pysyqtasyn, - dedi Oljas Bektenov.
Buǵan deıin bıyl eldegi avtojoldardyń aqyly ýchaskelerindegi tarıfter orta eseppen 30 paıyzǵa ósýi josparlanǵany málim bolǵan edi.