Jol salý barysynda jyldamdyq pen sapaǵa kóp kóńil bólemiz – Kólik mınıstri
QR Kólik mınıstri óńirlerge jasaǵan jumys sapary barysynda Almaty qalasynan Óskemenge deıingi avtojoldardyń qurylysy men júrgizilip jatqan jóndeý jumystaryn qarap, kórdi.
Vedomstvo basshysy Shamalǵan stantsııasyn aınalyp ótý, «Saryózek-Kóktal», «Taldyqorǵan-Úsharal», «Úsharal-Dostyq», «Qalbataý-Maıqapshaǵaı» jáne basqa da respýblıkalyq mańyzy bar avtojoldar ýchaskelerinde júrgizilip jatqan kúrdeli jóndeý jáne rekonstrýktsııalaý boıynsha jumystardyń ilgerileýin tekserdi.
Marat Qarabaev ýchaskelerdiń merdigerlerimen úlken jıyn ótkizip, barlyq problemalyq másele egjeı-tegjeıli qaraldy, sondaı-aq jańadan qurylǵan mınıstrliktiń aldaǵy kezeńge arnalǵan josparlary men talaptary aıtyldy.
«Halyqqa arnaǵan Joldaýynda Memleket basshysy eldiń tranzıttik-logıstıkalyq áleýetin damytýǵa erekshe nazar aýdardy. Sondyqtan jeke Kólik mınıstrligi quryldy. Jańa vedomstvo aldynda turǵan mindetter zor. Biz elimizdegi joldardyń sapasy boıynsha jaǵdaıdy shuǵyl túrde baqylaýǵa alyp, barynsha jaqsartýymyz kerek. Sizder «Qazavtojolmen» jumys isteýge daǵdylanyp qalǵansyzdar. Alaıda qazir jumystyń sapasy men barynsha jyldamdyqty qamtamasyz etý úshin salalyq mınıstrlikpen tyǵyz jumys isteýge týra keledi», dedi mınıstr.
Marat Qarabaev kezdesý barysynda belgilengen merzimderden artta qalǵan merdigerler úshin jaǵdaıdy óz qoldaryna alyp, qalyptasqan problemalardy túpkilikti belgileý úshin Kólik mınıstrligimen birlesip sheshýge sońǵy múmkindik bar ekenin atap ótti.
«Álbette, sizderdiń jaǵdaılaryńyzdy túsingim-aq keledi. Oǵan qosa, jumys barysynda halyqqa óz paıdamdy tıgizýge tyrysamyn. Osy kezdesýden keıin jaǵdaı barynsha jaqsarmasa, naqty sharalar qabyldaıtyn bolamyz. Aldaǵy ýaqytta Qytaı Halyq Respýblıkasynyń kólik jáne kommertsııa mınıstrlerimen kezdesemin dep josparlap otyrmyn. Ol jerde sizderdiń taraptaryńyzdan atqarylǵan qyzmet sapasy boıynsha mindetti túrde óz oıymmen bólisetin bolamyn. Burynǵydaı qoldy qaltaǵa salyp, bos júretin ýaqyt joq. Sizder kún-tún demeı, qurylys jumystary aıaqtalǵanǵa deıin jolda bolýlaryńyz kerek», dedi mınıstrlik basshysy.
Sondaı-aq Marat Qarabaev jol qurylysshylaryn bıtýmnyń qajetti kólemimen qamtamasyz etý boıynsha máselelerdi sheshýge ýáde berdi. Sonymen birge ol Qazaqstannyń avtojol qurylysyna qatysatyn barlyq otandyq merdiger jáne sheteldik kompanııalarmen aldaǵy ýaqytta kezdesý uıymdastyrylatynyn aıtty.
«Jańa mınıstr retinde basty mindetim – barlyq respýblıkalyq joldardy basyp ótip, avtojoldardaǵy jaǵdaıdy baǵamdaý. Biz jyldamdyq pen sapaǵa basa nazar aýdaryp otyrmyz. Osy aptada ortalyq jáne ońtústik óńirlerge barý josparda bar. Sodan keıin 2024-2025 jyldarǵa arnalǵan jumys kólemin talqylaý úshin áriptesterimizben kezdesý ótkizemiz», dedi M.Qarabaev.
Demalys kúnderin paıdalanyp, kólik mınıstri «Qalbataý-Kókpekti» jol ýchaskesinde keńes ótkizip, bas merdigermen qalyptasqan jaǵdaıdy talqylady, sonymen qatar jumys qarqynyn ilgeriletýdi tapsyrdy.
