Jol salatyn otandyq kompanııalardan konsortsıým qurylady

ASTANA. KAZINFORM – Jol salatyn 2 jáne odan da kóp otandyq kompanııalardan konsortsıým qurylady. Bul týraly Kólik mınıstrliginen málim etti.

«Bizde avtomobıl joldarynyń qurylysy halyqaralyq qarjy ınstıtýttarynyń qaryzdary esebinen, respýblıkalyq bıýdjetten jáne jeke ınvestorlardyń qarajatyna júzege asyrylady. Qaryz arqyly júzege asyrylatyn jobalardy kóp jaǵdaıda sheteldik kompanııalar jeńetinin moıyndaımyz. Aıta ketý kerek, bul jaǵynan talaptar óte joǵary. ıAǵnı, otandyq kompanııalar árdaıym osy joǵary talaptarǵa (qarjylyq aınalym, tájirıbe, tehnıkamen jabdyqtaý jáne mamandardyń kásibıligi) jaýap bere almaıdy. Sondaı-aq, halyqaralyq qarjy ınstıtýttary jol qurylysyna merdigerlik uıymdardy aıqyndaý kezinde olardyń erejeleri men talaptaryna sáıkes konkýrstar ótkizedi», - dep atap ótedi mınıstrlikten agenttiktiń saýalyna oraı.

Vedomstvonyń atap ótýinshe, osy máseleni túpkilikti sheshý úshin Qazaqstan Úkimeti qaýymdastyqtardyń kómegimen halyqaralyq konkýrstardyń sharttary boıynsha otandyq kompanııalarǵa birneshe túsindirý jumystaryn júrgizdi.

«Budan basqa, bizdiń sharttarymyzǵa sáıkes halyqaralyq qarjy ınstıtýttarymen konkýrsqa qatysý úshin biliktilik talaptaryn ońaılatý boıynsha kelissózder kózdelgen. Sonymen qatar 2 jáne odan da kóp otandyq kompanııalardan qurylǵan konsortsıýmdardy qalyptastyrý josparlanǵan. Osy sharanyń arqasynda otandyq kompanııalardyń deńgeıi sheteldik kompanııalarmen básekelese alady. Munan bólek, sheteldik kompanııalar úshin otandyq kompanııalardy qosalqy merdigerlik jumysqa tartý jónindegi talaptar kúsheıtiletin bolady. Qorytyndylaı kele, otandyq kompanııalardyń tájirıbesin eskere otyryp, bolashaqta olar iri avtojol jobalaryn iske asyrýǵa daıyn dep sanaımyz», - dep atap ótedi Kólik mınıstrligi.