Jol salasyndaǵy jobalardy tekseretin komıssııa qurylady

NUR-SULTAN. QazAqparat – Keıingi 10 jylda iske asyrylǵan avtojol jobalaryn tekserý úshin Qarjy, Ulttyq ekonomıka, Ádilet mınıstrlikteriniń, Básekelestikti qorǵaý jáne damytý agenttiginiń, prokýratýra organdary men «Atameken» ulttyq kásipkerler palatasynyń ókilderi kiretin komıssııa qurylady, dep habarlaıdy QazAqparat tilshisi.

Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev osyndaı málimet taratty.

«Avtojol salasyn reformalaý sheńberinde kelesideı sharalar qabyldanatyn bolady:

Birinshi. «QazAvtoJol» ulttyq kompanııasy aktsıonerlik qoǵamy «Qazaqavtojol» jaýapkershiligi shekteýli seriktestigimen biriktiriledi. Qaýly jobasy Úkimetke bıylǵy tamyz aıynda engiziletin bolady.

Ekinshi. Sońǵy 10 jylda iske asyrylǵan avtojol jobalaryn tekserý jónindegi komıssııa qurylady.

Komıssııa quramyna Qarjy, Ulttyq ekonomıka, Ádilet mınıstrlikteriniń, Básekelestikti qorǵaý jáne damytý agenttiginiń, prokýratýra organdary men «Atameken» ulttyq kásipkerler palatasy ókilderi kiredi. Qaýly jobasy Úkimetke osy jyldyń tamyz aıynda engiziledi», - dedi vedomstvo basshysy.

Sondaı-aq, ol kúzde zańǵa qurylys protsesine qatysýshylardyń báriniń jeke jaýapkershiligin kúsheıtetin normalar engiziletinin atady.

«Jergilikti kásipkerlik pen naryqty damytý maqsatynda otandyq merdigerler úshin shartty jeńildikter men preferentsııalardy qoldaný boıynsha qoldanystaǵy satyp alý qaǵıdalaryna ózgerister engiziledi», - dedi mınıstr.

Úkimettiń keshegi keńeıtilgen otyrysynda Prezıdent Qasym-Jomart Toqaev iri kompanııalardyń jol salý tenderin utyp alyp, jumysty merdigerge ysyra salatynyn synaǵan edi.