Jol salasyndaǵy normatıvtik qujattar sany 1 200-den 50-70-ke deıin kemıdi - mınıstrlik
Indýstrııa jáne ınfraqurylymdyq damý mınıstrliginiń málimetinshe, o sy tarapta júrgizilgen revızııa salalyq erejelerge sáıkes jumys ýaqytyn azaıtýǵa jáne jol qurylysy men jobalaý jumystarynyń sapasyn arttyrýǵa baǵyttalǵan.
«Jobalaý, qurylys jáne avtomobıl joldaryn paıdalanýǵa berýdiń sapasyn arttyrýda jol salasyndaǵy qurylys normalary, standarttary men normatıvtik-tehnıkalyq qujattar bazalyq ról oınaıdy. Búginde elimizde 1 200-den astam salalyq qujat qoldanysta. Onyń ishinde, 114 qurylys normatıvteri (QR QN, QR EJ), 303 ulttyq standart, 527 memleketaralyq standart (MS), 17 vedomstvolyq norma, 200 vedomstvolyq normatıvtik-tehnıkalyq qujat jáne 56 baǵa belgileý men smetalyq jınaqtar bar», - dep jazdy vedomstvodan.
Profıldik qujattardyń shamadan tys kóp bolýy men retsizdigi olardy basymdyqtar boıynsha anyqtaý kezinde birshama qolaısyzdyq týdyrady. Sonymen birge qujattarda jıi kezdesetin sáıkessizdikter, qarama-qaıshy talaptar, qaıtalama jáne eskirgen normatıvter jaǵdaıdy odan ári kúrdelendirip, jobalaý men qurylysta kóptegen qatelikterge jol beredi.
«Bul oraıda qalyptasqan beı-bereketsizdik qazirgi qoldanystaǵy memlekettik satyp alýlar kezindegi jaǵdaıdy týdyryp otyr. Bylaısha aıtqanda, qazir ulttyq standarttardy, onyń ishinde jol salasyndaǵy standarttardy ázirleýge kez kelgen fızıkalyq nemese zańdy tulǵanyń qatysýyna múmkindik beredi. Bul óz kezeginde normatıvtik qujattyń sapasynyń tómendeýine, onyń shynaıylyǵy men jol mekemeleri úshin qajettiligine áser etedi.
Jalpy kez kelgen qurylys sapaly jobalaýdan bastalatyny belgili. Elimizdegi avtokólik joldary júıelerin damytý boıynsha ulttyq deńgeıdegi mindettemelerdi ońtaıly sheshý úshin QR Indýstrııa jáne ınfraqurylymdyq damý mınıstrligi avtokólik joly salasyn normatıvtik baqylaýǵa júıeli revızııa jasaý qajettigine mańyz berýde», - dep jazdy mınıstrlik.
Memleket basshysynyń bıylǵy Qazaqstan halqyna arnaǵan Joldaýynda aıtylǵan tapsyrmalardy oryndaý úshin IIDM mınıstri Qaıyrbek Óskenbaev Qazaqstan jol ǵylymı-zertteý ınstıtýtyna normatıvtik bazany qalyptastyrý barysynda ózgeshe tásil qoldanýdy tapsyrdy. Ulttyq standartty ázirleý aldynda jan-jaqty ǵylymı zertteý júrgizilýi tıis. Sonymen qatar zerthanalyq jumystardyń nátıjesi, tájirıbelik aýmaqtar men pılottyq jobalarǵa uzaq ýaqyt boıǵy monıtorınginiń qorytyndysy da nazarǵa alynýy qajet.
Osy tarapta júrgizilgen reformanyń nátıjesinde jetildirilgen jańa qurylymdyq normatıvtik qujat qurylýy tıis. Ondaǵy qujattar sany 50-70-ten aspaıtyn bolady. Jańa pakette standarttar men normatıvtik-tehnıkalyq qujattardyń basymdyǵyna aıqyn shekteýlerdiń engizilýine basymdyq beriledi. Sondaı-aq jańa tehnologııalardyń paıda bolýyna baılanysty qujattardyń operatıvtik mańyzdylyǵyna da nazar aýdarylmaq.
